سبب هجوم حمو بيكا على عمر كمال.. وهل يتم الصلح بينهما؟

شن مطرب المهرجانات حمو بيكا هجوما حادا على صديقه عمر كمال، وذلك عبر صفحته الرسمية على موقع التواصل الاجتماعي "فيس بوك".
هجوم بيكا
ونشر "بيكا" صورة لعمر كمال، موضوع عليها علامة "×" معلقا عليها قائلا: "ياريت محدش يكلمنى فى شغل على الشخصية دى، عشان أنا كنت بحبها، والشخصية دى بتتهرب من شغلى اللى خلانى اتفق عليه، والاثبات بعد الصورة دى هنزل فيديو"، مضيفا: "هو عامل بيحبنى وهو بيكرهنى.. مع السلامة يا صحاب مزيفة".
سبب الهجوم
وظهر حمو بيكا في بث مباشر بعدها قال فيه: "لما تطلع تتكلم، تحدد النجاح مين اللي عمله معاك، أنت مبنتش نفسك بنفسك، وأنت ظاهر أمام الشعب المصري إنك أناني مبتحبش غير نفسك، وحابب إن أنت تصنع النجومية لنفسك وبس، فكك من اللي أنت بتعمله وخليك محترم وكويس.. أخونا عمر كمال لما سمع اللي اتقال قال إحنا نجحنا، لكن اللي أنا شايفه إنك كلك على بعضك غلط، حياتك غلط، دنيتك كلها ماشية غلط في غلط، عايز تحقق نجاحك أنت بس، فرجني يا فهلوي يا حلو واعمل كام تراك لوحدك".
رد عمر كمال
وخرج بعدها مطرب المهرجانات عمر كمال عن صمته للرد على هجوم حمو بيكا من خلال بث مباشر عبر صفحته الرسمية على موقع التواصل الاجتماعي "فيس بوك".
وقال "كمال" فى مقدمة الفيديو: "أنا تحملت كتير جدا إهانات بعض الناس، لكن أنا ممكن أطلع أقول لك يا (أبو كرش) لكن كل دي إهانات أنا ماليش فيها".
وتابع: "الشخص اللي بيتكلم عليا ده أول ما بينزل من إسكندرية بيجي على شقتي وواكلين عيش وملح مع بعض، اللي حصل إن وأنا قاعد عند الحلاق بتاعي ومعايا حمو فوجئت إنه جايب شخص بتاع فساتين وعايزنا نعمل له إعلان من غير ما ياخد إذني، وأنا اتحرجت أرفض قدام الراجل، بس أنا مش عايز أعمل مهرجان لفستان فرح، أنا عايز أعمل فن كويس زي بنت الجيران وعود البطل وكل مهرجاناتي، وحتى بعد الاتفاق ما دفعش ليا عربون ولا سألني تاخد كام".
مليون و800 ألف جنيه
وواصل في هجومه على حمو بيكا: "عيب تقول عليا إني صحبة مزيفة، أنا عمري ما كسبت من وراك، أنا سبت لك 12 تراك كلت من وراهم الشهد، حتى العربية بتاعتك أنا اتصدرت أنا ومدير أعمالي عند المعرض عشان يقسطها لك، وضمنتك في مليون و800 ألف جنيه، ولو كنت لوحدك ما كانش حد هيديك عربية".
بداية الأزمة
وتعود بداية الأزمة، إلى خروج حمو بيكا فى فيديو له منذ يومين، نشره عبر حسابه على موقع "انستجرام" وهو يهاجم أحد المطربين دون ذكر اسمه، لافتًا إلى أن هذا المطرب يدعى أن أغانيه كانت الأكثر بحثاً على جوجل خلال عام 2020، حيث وصفه بيكا بالأنانية الشديدة، وأن تصريحاته لا تتفق مع الواقع.
وأكد "بيكا"، خلال الفيديو أن أكثر 5 أغان بحثاً على جوجل طيلة العام كانت له هو بواقع أغنيتين والباقى ل عمر كمال.
الصلح
وفي وقت سابق، وقعت أزمة بين حمو بيكا وحسن شاكوش وتبادل الطرفان الاتهامات، إلا أن بعض المقربين تدخلوا للصلح بين الجانبين، مما يجعل إمكانية الصلح بين عمر كمال وحمو بيكا واردة مع تدخل أصدقاء الطرفين.