يوميات رئيس.. حلقة رقم (4).. مرسى يعلن انضمامه لحركة تمرد

دخل مدير مكتبه فوجده يرتعش ويصرخ: أنا بردان قوي عايز بطاطين القصر كلها بسرعة ومحدش يقول للشاطر.
مدير مكتبه يشخط فيهم: انتم بتتفرجوا على الريس وهو بردان.. مفيش دم عندكم بسرعة هاتوا كل بطاطين القصر ويقترب من الريس إيه اللي حصل ؟
الريس: المحكمة هتعيد التحقيق في قضية هروبي من السجن يعني مسجون مسجون يا ولدي.
مدير مكتبه: يا ريس هو انت بتصدق الكلام ده برضه يا راجل عيب عليك مايبقاش قلبك ضعيف هتشمت فيك الأعادي.
الريس: وهم لسه مشمتوش يا فالح ده إمبارح كان عيدهم والكلام اللي تقال خلى بطني كركبت يا محترم.
مدير مكتبه: يا ريس دول بتوع هيصة وبس ولا يهمك.. وبعدين هيعملوا فيك إيه يعني هتروح السجن الحمد لله طول عمرنا في السجون والسجن للجدعان وانت أبو الجدعنة يا أبو زُمّل صح ؟
الريس يعض على لسانه: وهو المعتقل ده مكتوب علينا حتى بعد ما بقيت ريس.
مدير مكتبه: شوف يا سيدي طول ما المعارضة شايفينك مهزوز مش بعيد يدخلوا عليك القصر ويعلقوك في التحرير أو يعملوا فيك زي القذافي.
الريس: يا نهار أسود دي تبقى وقعة سودة بجد طب وإيه العمل ؟
مدير مكتبه: مفيش غير حل واحد.
الريس مضطرب: الحقني بيه أبوس على أيديك ؟
مدير مكتبه: بص يا سيدي انت تطلع في التليفزيون وتصدر قرارا باعتقال كل من البلتاجي. والشاطر. والمرشد. وأبو إسماعيل. وعبد الماجد. وكمان بتوع حركة تمرد.
الريس يحط يده على دقنه: لا بتوع تمرد صعب قوي هيجيب لهم سجن منين دول 15 مليون لا صعبة قوي دي.
مدير مكتبه: وكمان يا ريس ممكن تقعد تعيط شوية وتنزل لك كام دمعة كده وتحلف بالطلاق أن يعطوك فرصة لحد آخر السنة وانت هتعتزل وتسيب البلد كلها وتمشي.
الريس: طب تفتكر الشعب هيصدق أصلي أنا كدبت عليهم كتير لا لا شوف حل تاني.
مدير مكتبه: يكبر ويهلل خلاص يا ريس وجدتها فكرة بخمسة مليار جنيه لكن انت حبيبي من أيام المعتقل
الريس: اخلص دي كانت أيام سودة لازم تفكرني بيها
مدير مكتبه: بص يا ريس انت تتنازل عن الحكم لابنك أحمد وما شاء الله هو بيفهم كويس قوي في السياسة
الريس: تصدق أنك أهبل وعبيط ومن حقهم يمسحوا بيكم الأرض.
مدير مكتبه: مالك انت زعلان ليه لسه قدامنا 4 أيام يعني قدامنا وقت نفكر وبلاش عصبية عشان أعرف أفكر.
الريس زعلان: لا تفكر ولا أفكر مفيش غير حل واحد بس أني انضم إلى حركة تمرد وهما يحموني وأعلن ده بنفسي على الفضائيات _ويرقص_ هو ده الشغل يا مرسي الله عليك يا حبيب والديك دي ضربة في الجون يا معلم.
مدير مكتبه: واحنا يا ريس
الريس وهو يرقص نفسي نفسي يا حبيبي !