شلاليت

حلمت إني الرئيس وبإيدي قوت القوت
ومافيش بشر في البلد من حكمي يوم هيفوت
واللي يفكر في يوم يعمل لي فيها كبير
من غير ما يعرف هيشبع ضرب بالشلوت
وقعدت ع الكرسي.. واتجمع هنا الحراس
وهتاف كتير كل حبة بين جموع الناس
وأنا وسطهم بالخطب عمال أقول وأعيد
في كلام كتير أي حاجة.. بس كله حماس
والحلم بيزيد وأفكر إن أنا السلطان
وبأن حكمي بقي أكبر كمان وكمان
وقلت خليك كدا في الزفة للآخر
وجمع المحظوظين م الإخوة والأعوان
ونسيت هموم الزمن والضرب والتلطيش
والدنيا مقلوبة لكن في الكلام ده ماليش
رؤساء ووزراء وشعب ودنيا مقلوبة
وأنا وسطهم صولجان أكبر وما تقوليش
وأنا في الرئاسة سعيد.. مراتي صحتني
وقالت لي قوم.. اصحي.. فوق.. الجوع مموتني
قوم هات رغيف للعيال بطل بقي تحلم
قلت لها حتي كمان ما أحلمش.. شدتني
الحلم كان حلو بس اتغيرت أحوال
أنا كنت فين والنهار ده فين من الأهوال
وقعدت ع الكرسي أفكر بكرة أعمل إيه
لو سبت يوم الرئاسة.. وده أهم سؤال