شلاليت

مافيش حد عارف حنوصل لفين
ومين اللي مسئول عن الشعب مين
وكلَّه في كُلَّه ومين اللي أقول له
في ناس هايصة خالص وناس مطحونين
ياريت حد يقدر يقول الحقيقة
ويخرجنا من كل موقف وضيقة
يفكر في حالنا وحالة عيالنا
ويوصف حالتنا دقيقة بدقيقة
يوماتي بنسع كلام في كلام
ومسئول يقول لك.. دكُلُّه تمام
وناس في الشوارع بتشقي تصارع
عشان لقمة لعيالها وسط الزحام
يا عالم قولوا لنا ليه الثورة قامت
وناس فيها هامت.. وناس فيها لامت
وناس استحلَّت وناس استغلت..
وناس فيها شبعت وناس فيها صامت
أنا نفسي أعرف ليه الشعب ثار
وضحى بشبابه وعايش في نار..
وليه كل حبة.. حرايق وشابَّة
ما بين المعارضة وصاحب القرار
قولوا لي حنفضل كدا في الحوار
وإيه النتيجة في آخر المسار
أقول كلمة واحدة تحرك قلوبكم
د مصر بتحلم بشمس النهار