وقفة صامتة في الذكرى الثالثة لاستشهاد خالد سعيد

أعلنت صفحة "كلنا خالد سعيد"، على موقع "فيس بوك"، اليوم السبت، عن تنظيم وقفة صامتة يوم 6 يونيو الجاري، تحت عنوان "حق خالد سعيد.. حق كل شهداء مصر"، على كل كونيش في مصر.
وقالت: "قبل ثلاث سنين، وتحديدا يوم 6 يونيو استشهد خالد سعيد، فاكرين كلنا إزاي اتحركنا علشان قضيّته وافتكرنا لو كنّا في مكانه كان حصلّنا نفس الّلي حصلّه.. بدأنا وقفاتنا الصامتة، اتحركنا في كل محافظات مصر شباب وبنات، بنعترض على تعذيب وزارة الداخلية وانتهاكاتها المتكررة لحقوق الإنسان.. غضب شعبي كان بيظهر يوم ورا التاني ضد سياسات النظام كلها، حصلت مظاهرة عند وزارة الداخليّة بعد ما استشهد خالد سعيد، وبدأت سلسلة من الوقفات الصامتة بتقول للناس: حق خالد سعيد هوّا حق كل مصري.. خالد سعيد ضمير العصر".
وتابعت:"أعلنّا عن ثورة في يوم الثلاثاء 25 يناير 2011، الناس اتريقت علينا وقالوا: محدّش بيعلن موعد ثورة باليوم والساعة، وخرج آلاف الشباب بيطالبوا بعيش وحريّة وكرامة إنسانيّة وعدالة اجتماعيّة".
وأضافت: "جمعة الغضب خرج الشعب كله بيطالب بإسقاط النظام، ثار ضد النظام الفاسد والمستبدّ، هتفنا كلنا الشعب يريد إسقاط النظام.. الشعب يريد محاكمة الرئيس.. أيّام كنا فيها كلنا إيد واحدة في ميدان التحرير وميادين مصر كلها لغاية ما خلعنا مبارك ورءوس نظامه الفاسد يوم الجمعة 11 فبراير..انتقلت السلطة للمجلس العسكري، واتفرقنا بعد ما كنا إيد واحدة، تعديلات دستوريّة وعلمانيّة وإسلاميّة رغم إن القضيّة إنسانيّة: انتهاكات الداخليّة. ورجعت الانتهاكات من جديد: مسرح البالون، فض الميدان أول رمضان، ماسبيرو، محمد محمود، مذبحة بورسعيد. وبين ده كله: محاكمات هزليّة متحاسبشي فيها القاتل".
وأوضحت:"انتخابات رئاسيّة، فوز محمد مرسي، شهور وبعدها: انتهاكات مُتكرّرة، تسلّط وإخلاف لوعود قالها للشعب قبل ما يتمّ انتخابه رئيسا.. شهداء جدد، تعذيب مستمر، انتهاكات لم تنته وثورة لن تنتهي حتى تنتصر.. أيّام وهتكون الذكرى الثالثة لاستشهاد خالد سعيد، منسيناش ليوم إن دمّ خالد سعيد هو دمّ كل شهداء مصر، وإن ذكرى خالد سعيد هي ذكري كل الشهداء الخالدين في قلوبنا وعقولنا.. وإن حق خالد هو حق كل شهداء مصر.".
وأشارت إلى أنه :"قبل الذكرى بخمسة أيام، تقضي محكمة جنايات الإسكندرية بالإفراج عن المتهمين بقتل الشهيد خالد سعيد، وتُؤجّل القضية لجلسة 6 يوليو..في ذكرى استشهاد خالد سعيد يوم الخميس 6 يونيو، هنخرج في وقفات صامتة نفكّر الشعب بالشهداء وبحقّهم إلّي لسه مرجعشي، هنفكرهم بأنهم خرجوا بيحلموا بنظام مبني على الحريّة والعدالة الاجتماعيّة والكرامة الإنسانية وماتوا علشان ده يتحقق،، ولسه حلمهم متحققشي".
وتابعت:"هنرفع في إيدينا صورة لكل شهيد، نقرأ عن حياته وإزاي استشهد علشان نفتكر شهداءنا الّي ضحّوا بأرواحهم علشان نعيش في بلد بتحترم حقوق الإنسان، هنفتكر الشهداء الّي نوروا لنا طريقنا وكسروا جدران الخوف والصمت والذلّ والإهانة..هنفكّر الناس بيهم، هنفكرهم بأحلامهم وبحياتهم وازاي استشهدوا.. سواء كنت شاركت معانا قبل كده في وقفاتنا الصامتة أو مشاركتش، هتنزل معانا لابس أسود، بتطالب بمحاكمات عادلة لقتلة الشهيد خالد سعيد، وقتلة شهداء ثورتنا.. هتطالب معانا بالقصاص لحق الشهداء والمصابين.. وهتطالب بحق الشعب أنه يعيش في: كرامة وحريّة وعدالة اجتماعيّة".
وقالت: "كل واحد وواحدة هيشاركوا في الوقفة الصامتة الّي هتكون في كل محافظات مصر، هيلبس أسود وهيرفع صورة شهيد، يعرف قصّته ويحكيها للي هيسأله.. هيفكّر الناس بمطالبه وهيقولهم: إن الثورة لسه مستمرة وهتنتصر طول ما إحنا موجودين.. هنتقف في صمت، وهنتمرد على الظلم ومش هنسمح لحد يسرق مننا حلمنا.. هندافع عن أحلامنا وهنكسر كل قيد يوقفها.. وهنحققها".