خدعة لإلهاء الشعب عن مشروع قناة السويس والقوانين سيئة السمعة!

شعرت فجأة باللخبطة .. كادت تصيبنى سكتة دماغية .. فحال البلد قد انقلب رأسًا على عقب بظهور هذه الحملة الملقبة ب«تمرد» .. لم يمر هذا على الفقيرة إلى الله مرور الكرام .. فجبهة الإنقاذ أصبحت على هامش الأحداث .. ولا يوجد برنامج إعلامى إلا وحركة تمرد على رأس فقراته .. إذًا الحكاية فيها إنّ .. وأى إنّ فى مصر عقب تولى الإخوان السلطة أعرف من أين تأتى .. لم أتردد فى ارتداء ملابسى والاتجاه نحو مكتب المهندس خيرت الشاطر .. فى طريقى كنت أتمتم بما يدور فى ذهنى من أن الشاطر عنده الخبر اليقين .. كنت أفكر فى كيفية الخروج منه بمعلومات تثبت توقعاتى وهواجسى .. وصلت إلى مكتب الشاطر أسرع مما توقعت.. فأصبحت التساؤلات حائرة .. طلبت الدخول إليه ، وعندما أبلغه مدير مكتبه، فوجئت بالشاطر يستقبلنى بنفسه قائلا: أهلًا أهلاً بالخالة «سطوطة» .. نورتى المكتب .. بهذه العبارات استقبلنى .. دخلت فأغلق باب مكتبه بعد أن أمر بالقهوة التى أشربها معه دائمًا ويعرف أنها مضبوطة بن تركى ..
قلت له : وبعدين فيك ياعم خيرت هتودى البلد لفين ؟!
ضاحكا قال : كده أنا فهمت انتى جاية ليه ياخالة سطوطة
قلت : طيب ريحنى ياروح خالتك !!
قال : أبدا والله.. أنا بس «بتسّلىّ» بالعالم العبيطة دى ..
قلت : ألا تخشى من حملة تمرد التى يوقع عليها الناس بالملايين أن تعصف بكم ؟!
ضحك الشاطر بشدة ووسط قهقهته قال بصعوبة: تمرد إيه ياولية اللى ممكن تطيح بينا دى .. انتى مش عارفة بتكلمى مين ولا إيه ؟!
قلت : المصيبة إنى عارفة باكلم مين .. علشان كده عايزة أفهم !!
قال : إنتى مشكلتك ياخالة سطوطة مابتكتميش السر وبتفضحينا فى درب الفشارين بتاعك
قلت : لا ياروح خالتك ماتقلقش .. سرك فى بير واعتبر ده وعد بس ريحنى !!
رشف رشفة من فنجان القهوة وقال لى : إيه رأيك ياخالة فى القهوة التركى دى .. جايبها من مكتب أردوغان رأسًا !!
قلت : ياللا بقى قول وسيبك من القهوة .. جميلة ياسيدى .. تسلم إيدك وإيد أردوغان بتاعك !!
ضاحكًا قال : شوفى ياستى وما سيدك إلا أنا .. لغاية الشهر اللى فات كانت جبهة «الزفت» الإنقاذ مبهدلانا وكل يوم يوزعوا بعض على البرامج وهات يا تصريحات بأننا هنخرب مصر وهنبيعها لليهود .. وطبعًا عمنا مرسى كل شوية يكلمنى ويشد فى شعر راسه وداوش المرشد ومافيش على لسانه إلا كلمتين «شكلنا هنتبهدل .. شكلنا هنرجع تانى للمعتقلات» .. قلت فى نفسى طب نعمل إيه علشان نخلص من جبهة الخراب دى .. تعمل إيه ياواد ياشاطر تعمل إيه .. لغاية ماجاتنى الفكرة اللى حلت كل المشاكل .. ويادوب ابتدى مرسى يشتغل بهدوء وقنديل ابتدى يبرطع فى مشروع قناة السويس اللى كانوا بيهيجوا الناس علينا من خلاله .. وابتدينا نعمل فى هدوووووووووووووء على رأى عماد أديب !!
قلت : ماشى ياسيدى .. إيه بقى أم الفكرة دى .. أنا جاية عايزة أعرف إيه الفكرة !!
قال : وأنا عارف إنك عارفة بس عايزة تتأكدى .. أنا برضو هاطلع أحسن منك وهريحك بس زى ما اتفقنا !!
قلت : فى بير ماتقلقش !!
قال : أنا ياستى اتفقت مع كام عيل من الشباب بتوعنا اللى هما مش معروفين للعامة من الناس وقلت لهم عايزكم تبتدوا تتكلموا مع الشباب الثورجية اللى هما مش منتمين للأحزاب بتاعة جبهة الخراب وليسوا معروفين للإعلام.. وتقنعوهم بأنكم عايزين تعملوا وثيقة اسمها تمرد ليقوم بالتوقيع عليها كل من يرفض حكم مرسى ... بحيث تكونوا خارج سيطرة الأحزاب المعروفة وخاصة أحزاب جبهة الإنقاذ .. ولكى يتشجع معكم الشباب اطلبوا منهم أن يكونوا مسئولين عن الحملة واختاروا منهم متحدثًا باسم الحملة ومنسقًا للحملة .. واخترعت لهم عدة مناصب للحملة تتكرر فى كل محافظة ومركز على مستوى الجمهورية... بل وخصصت لهم مبلغًا ماليًا حتى يبدو أمام زملائهم أنهم سينفقون من جيوبهم على الحملة حتى تنتشر ... وبعد ذلك ستنفق الحملة على نفسها .. وبالفعل بدأ الشباب فى التحرك والانتشار وأعلنوا كراهيتهم لسياسة مرسى بل وللإخوان عمومًا... حتى كان الشاب منهم يقول علينا خرفان بالنهار ثم يأتى ليأخذ الإرشادات فى المساء .. ترك شبابنا الحملة للشباب المعارض وأخذت طريقها بالفعل فى الانتشار الطبيعى دون أن يعلم القائمون عليها الآن أنهم ينفذون مخطط الشاطر اللى هو أنا ... وتحقق الهدف بحذافيره ياخالة سطوطة !!
قلت : وماهو الهدف الذى تحقق بحذافيره ياروح الخالة سطوطة ؟!
قال : لقد التفت الإعلام إلى الشباب المتمرد وترك ضيوفه الدائمين من جبهة الإنقاذ .. بدأت الصحف تلهث خلف الشباب ليتتبعوا تحركاتهم وتركوا اهتمامهم السابق بتحركات جبهة الخراب وأحزابها .. وانتشرت الظاهرة فى القرى ووقع على الوثيقة أكثر من ثلاثة ملايين مواطن.. ونحن نعلم أن معارضينا يبلغ عددهم نفس عدد الأصوات التى حصل عليها شفيق وقد يزيدون .. الأمر الذى سيأخذ وقتًا يزيد على الشهرين فى جمع التوقيعات ... وبالتالى يبدأ عمنا هشام قنديل فى الانتهاء من مشروع قناة السويس بعيدًا عن ملاحقات الإعلام والمعارضة .. ويبدأ مجلس الشورى فى سلق القانون الخاص بالمشروع ويوافق الرئيس على المشروع .. وفى خلال الشهرين سوف نضع حجر الأساس لأكبر مشروع تشهده مصر طوال تاريخها .. بالإضافة إلى البدء فى العمل بقانون الصكوك وقانون الضرائب .. وسوف يفيق الجميع على الدولة وهى متأخونة ياخالة سطوطة !!
قلت : ياسلام سلم عليك وعلى دماغك !!
.. ضاحكا قال : والمفاجأة ياخالة أن الإخوة السلفيين كان هيطلع منهم ناس تقول إن الإخوان مبسوطين بانشغال المعارضة بحركة تمرد .. لكن علشان ربنا بيحبنا خرج من بينهم من أعلن عن حركة «تجرد» حماية للتيار الإسلامى ... مما أرغم السلفيين وأحزابهم على الالتزام بنشر فكرة «تجرد» حتى لا يظهر الإسلاميون أمام العامة من الشعب أنهم قلة وليس لهم أرضية فى الشارع .. حتى أصبحت معركة بين الجميع ... ونحن ننفخ فيها ليل نهار بعد أن أصبحت تدير نفسها بنفسها... ونعمل على إنهاء كل مشاريعنا التى كانت تلقى معارضة سواء من الإنقاذ أو أحزاب السلفيين وسلمي لى على مصر !!
وهنا أخذنا نغنى أنا والشاطر فى صوت واحد : ياحبيبتى يامصر يامصر ياحبيبتى يامصر يااااااااامصر !!