إسماعيل ياسين في وزارة السياحة: «آه يا شلاضيمى يانى يابا»

إننى أشعر بالانصهار.. فلقد دابت شلاضيمى من كثرة الكلام عن السياحة وأحوال وزارة السياحة.. إنهم يتكلمون أضعاف ما يعملون، وأنا وحياة ربنا مانيش غبى ولا مجنون.. وأسألوا عنتر بن شداد وأنطونيو ونابليون.. إنهم مازالوا يسكنون مستشفى المجانين، وسيؤكدون لكم أننى بكامل قواى العقلية.
آه والنبى ياخويا ده أنا بس عندى شعرة.. ساعة تروح وساعة تيجى.. بسبب ما رأيته في مدينتى "نويبع وطابا".. لقد كانتا من أعظم المدن السياحية في العالم قبل أن يقتلهما الإهمال وتتبدل بهما الأحوال واللى مش مصدقنى يروح يشوف الفنادق المهجورة ولو لقانى كداب ييجى يحطنى في "شوال" ويرمينى في أقرب ترعة تكون مياهها راكضة لا تتحرك، علشان كلاب السكك تأكل شلاضيمى وتخلصوا منى ومن كلامى.. آه يا شلاضيمى يانى يابا.. إنها هزلت وذبلت وتنيلت بستين نيلة.. وأنا لا أدرى في مصلحة من ما يحدث في نويبع وطابا، وإهمال وزارة السياحة لهما منذ أحداث يناير المشئومة ربنا ما يعودها علينا بأى شكل من الأشكال.
والنبى يا ستنا يا وزيرة السياحة دى منطقة كلها جمال وهدوء ومتعة، بس انتى جربيها وسيبى عربيتك تاخدك لغاية هناك، وانتى هتقولى مش راجعة تانى.. السياح من كل أنحاء العالم كانوا بيروحوا هناك وبيعشقوا ليالى السهر ورحلات السفارى وحفلات الشواء..وااااء وااااء
الفنادق كانت مليانة بالبشر يا ستو أنا.. لكن كل ده راح.. وأنا أشعر أن ضميرى سيغزنى في جمبى بسكين، إذا لم ألفت نظركم إلى هذا الإهمال.. واللى أنا مش عارف سببه إيه علشان شلاضيمى ترتاح وتتلهى على عينها.
ماهو مش لازم الرئيس "السيسي" يتدخل بنفسه في كل حاجة.. بقى معقول يبقى موجود هناك 33 فندقا، ولا يعمل منها سوى 5 أو 6 فنادق؟!.. الحقنى يا سامى يا سليمان يا ساكن نويبع.. إننى أشعر بالانعياء.. اكتر من 40 فندقا تحت الإنشاء كلها توقف العمل بها لأسباب ما يعلم بيها غير ربنا.. لقد بح صوتى.. إننى سأسكت عن الكلام ولن أقول سوى سلامو عليكووووووووووووو