إسماعيل ياسين في البيت: أنا مش زعلان ولا فرحان

آه والنبى ياخويا أنا مش عارف مالى.. قاعد في البيت كده "مستكنيص" وحالتى تصعب على "المدام".. ربنا يجعل كلامى خفيف عليها.. يارب ياخويا يارب.
لا أدرى ماذا أقول أو ماذا أكتب أو ماذا أريد أو ماذا أعى.. لكننى سوف أقول ولا بد أن أكتب وأريد وأعى.. فاسمعوووووو وعوووووو وتفرقعوا.
وزير الكهربا مصمم يرفع الدعم عن الفاتورة ويزود سعرها.. والمسكين مضطر يعمل كده علشان الوزارة بتخسر.. وفى نفس الوقت وزير التموين بيعمل خطوة حلوة أنه بيرفع الدعم عن القادرين من ملاك السيارات الفارهة والدخل الكبير وأصحاب الأراضي،واللى بيعلموا أولادهم في مدارس أجنبية بأسعار خيالي' ومصمم أن الدعم يوصل لمستحقيه فقط.
الوزير الأول مزعلنى، والوزير التانى مفرحنى علشان كده أنا مستكنيص ومش عارف أزعل ولا أفرح.
السكة الحديد خربانة ومتهالكة وعايزة تتعمل من أول وجديد وحوادثها بقت تقطع القلب.. وفى نفس الوقت الحكومة لأول مرة بتاخد إجراءات كويسة محترمة تجاه حوادث السكة الحديد، وقدرت تمتص غضب الشعب، وتطبطب على أحزانه فاستقال الوزير وجيء بخير منه "كامل الوزير" اسم على مسمى.
وبرضه الحالة الأولى مزعلانى، والحالة التانية مفرحانى علشان كده تلاقينى قاعد في البيت مستكنيص ومش عارف أزعل ولا أفرح.. آه يانى يادماغى يابا.. إننى أشعر بالانعياى.
الأهلي ابتدى يستعيد ثقته وبيتألق في أفريقيا لكنه معكنن علينا في الدوري المحلى.. والزمالك ابتدى يتقهقر، وفاضحنا وسط أندية أفريقيا لكنه لسه متربع على قمة الدوري المحلى، وأنا مش عارف أفرح والا أزعل.. إننى أشعر بالانعياى.. أي والله أنا عيان والسبب أننى مش زعلان ولا فرحان.
شايف البلد بتبنى والرئيس بيخطط لبكرة وفى نفس الوقت شايف ناس بتشتكى وخايفة من المجهول.. ناس بتبث فينا الأمل وناس عايزة تقولنا مافيش فايدة وأنا مش عارف أفرح والا أزعل أم أظل هكذا مستكنيص يا ولداه.. علشان كده النهارده بكلمكم من طراطيف مناخيرى ومن شلاضيم بُقى.. لذلك لا يسعنى إلا أن أقول لكم: سلامو عليكوووووووووووو