تعيين «بجاتو» يثير سخرية شباب «فيس بوك»

تعيين المستشار حاتم بجاتو في حكومة قنديل كان محل خلاف بين لجان الإخوان الإلكترونية وشباب فيس بوك، فقد أكد شباب الجماعة أن هناك كمينا وخطة سرية وراء تعيين بجاتو.. فيما طالب شباب فيس بوك بعمل «تاج» لبجاتو في «بوستات» الإخوان ليعرف تفاصيل خطة الإخوان من صفحاتهم.. «فيتو كافيه» رصدت تعليقات الشباب..
المجلس الأعلى للألش: صفحات الإخوان نشرت بوست سري للغاية عن حقيقة تولي بجاتو لمنصبه كوزير، شرحت فيه بدقة عالية أن موضوع المنصب ما هو إلا «خطة سرية» لإقالته من منصبه القضائي، وسؤال حلقة اليوم: «ليه الإخوان فضحوا نفسهم على الملأ وكشفوا الخطة السرية الخطيرة»؟..
1- علشان لا في خطة ولا نيلة وبيهزوا في أي بتنجان.
2- علشان بجاتو ماعندوش نت ولا تليفزيون ولا راديو ولا لب أبيض فمش هايعرف.
3- علشان التبرير خرم الزير.
لو عرفت الإجابة ما تبعتهاش على أي عنوان، وادعي معانا من قلبك على الأخوان.
نور الهجرسي: تبريرات الإخوان اللوذعية.. والنبي حد يعمل تاج لبجاتو علشان يTake care من التِرب اللي مرسي العفريت عاملهوله..!..
محمد جمال: رسالة إلى الأخ المبرر السياسي: إذا كان رأيك أن تعيين بجاتو كمين فاسكت وما تكشفش الكمين وتبوظ خطة الرئيس.
محمود المصري: المهم فعلا أن الناس كلها عرفت الخطة إلا بجاتو نفسه.. مش كده ولا إيه؟..
سلمى العتر: إيش فهمكم انتوا.. ده اختيار لولبي أسطوري.. موتوا بغيظكم.. حلو التبرير ده ولا مكشوف أوي؟..
خالد شبانة: على كل مبرراتي أنه يخف الضغط شوية ويهدى.. لأن عبقرية مرسي ستعين في يوم ما البرادعي وزيرا وصباحي نائبا..
أنا إخوان أنا مقطف بودان: نداء إلي أدمنز صفحات الإخوان.. هو حاتم بجاتو رجل المهام الصعبة وهو اللي منع التزوير فتتم مكافأته؟، ولا مرسي جايبه في المكان ده علشان بعد كده يعمل تعديل وزاري ويبعده عن الصورة خالص لأنه فاسد؟.. أرجوكم إرسوا على بر.. أول لما تتفقوا على التبرير.. ادوني رنة.
أمير البنهاوي: تم تعيين بجاتو حتى يستطيع بعد ذلك عزله من منصبه... على أساس أن عبد المجيد محمود النائب العام .. شغال فى المقاولين العرب دلوقتى.
كريمة عباس: بعد تعيين مونتير أفلام حكومية وزيرا للثقافة.. توقعات بأن يكون وزير الصحة في الحكومة القادمة بتاع حقن.