نوارة نجم توجه تويتات تحذيرية لمديرى صفحات الفيس

نشر شباب "فيس بوك" بوست للناشطة السياسية نوارة نجم، توجه عبرة مجموعة من النصائح لمديرى الصفحات الثورية؛ لتلافى القبض عليهم، بعد تزايد عدد أدمنز الصفحات الثورية المختفين، فماذا قالت..
أدمنز الصفحات لازم يفضلوا أنونيمس.. بلاش فتحة الصدر دى، كمان ما تتواصلش ولا تتصاحب على حد من النت لو سمحت
أدمنز الصفحات: مش أى حد يخش يشتم فى الإخوان ويبعت لك إنبوكس تضرب معاه صحوبية وتروح تقابله فى المظاهرة.. مش وقته خالص اليومين دول.
اللى فهمته إن أدمنز الصفحات بيكونوا صداقات مع ناس من النت على أساس رفقاء نضال.. وهم بيبقوا إخوان وبيسلموهم.. لو سمحتوا خدوا بالكوا
والأفضل من ده كله إن أدمنز الصفحات يبقوا إنونيمس، ويخش على الصفحة من إيميل ما حدش يعرفه غيره يبقى بتاع الأكاونت ده بس.. لو سمحتوا مش شجاعة إنك تسلم نفسك بسهولة لواحد قاعد على النت يصطاد الأدمنز، ومش مهم حد يعرف اسمك، المهم اللى بتكتبه على الصفحة ومش وقت عواتشيف الله يخليكوا كمان.. عايز عواتشيف نقى واحدة تكون عارفها وعارف أمها وأبوها وأصحابها.. عشان لو سلمتلك نعتر فيها ونعلقها.
أنا مش عايزة أفسر لحد ما أتأكد، بس فى حد من اللى اتقتلوا إحنا شاكين فى صاحبته... بس لحد دلوقت مجرد شك، احترسوا المزز.. بجد
احتياطى كده خط سيرك ما يبقاش معروف، مش أنت محضر رسالة "أنا اتمسكت" فى الموبايل؟ خلاص.. يبقى ما تديش خط سيرك ولا حتى لأهلك فى البيت.
مش لازم حد يسلمك يكون قاصد.. ممكن يقع بلسانه قدام حد تانى.. يبقى خلى بالك مدام هم متربصين بالكل كده.. مش طالبة تتقتلوا بلاش يعنى
فى تونس قتلوا بلعيد لأنه خطر عليهم، فى مصر، الإخوة المشاهير مش خطر على الإخوان.. العيال اللى ناكشة شعرها هى الخطر، وعشان كده بيصطادوهم.
ما تستهونش بنفسك وتقول وأنا مين يعني؟ هو أنا البرادعى؟ بالنسبة للإخوان صفحتك ونشاطك ونزولك مخليك أخطر من البرادعى
وأنا عارفة إنك عايز تستشهد وإنك شجاع وفاتح صدرك.. بس وأنت عايش بتخدم البلد أكتر من وأنت ميت.. مش شطارة إنك تسلم نفسك يقتلوك
أنت مستهيف نفسك.. بس أنت مش هايف.. اتعامل مع نفسك على أنك شخصية مهمة معلش عشان خاطرى أنا.. وخد احتياطاتك الأمنية.