إسماعيل ياسين في لجنة شئون الأحزاب: أما شيء بارد بصحيح!

آه والنبي ياخويا ده شيء بارد وأبرد من البرودة ذاتها.. تروح لجنة شئون الأحزاب تلاقي قائمة بأكتر من 90 حزبا.. يوه.. يا داهية دقي.. قول أكتر من 100 حزب في عين العدو.
أسكت يا بُقى يا أبو الشلاضيم.. أحسن يفتكروني بتريق على اللجنة واللى فيها.. تؤ تؤ تؤ.. أنا لا "أتتريق".. وإنما أنا عايز أعرف المائة حزب بيعملوا إيه.. أو هما فين أصلا يا سعادة البيه!
وتعالى يا عم جحا عد غنماتك.. الساحة السياسية ما فيهاش غير ثلاثة أو أربعة أحزاب هي اللى عليها العين.. منها حزب أنا معرفش هو موجود ليه لحد دلوقتى.. اللى هو حزب "النور" بتاع عمنا "نادر بكار" أبو كف رقيق وصغير.. و"ياسر برهامى" اللى كاره صوتى وكاره كلامى.. "ونامى نامى وادبحلك جوزين حمامي".
يا ترالّملّم لّملّم يا شيخ برهامي يا سياسي يا مخضرم.. المشايخ سابوا الدين وبقوا سياسيين "واجرى بسرعة يا واد يا حسين.. هاتلى منو فتوى واتنين"!
طب هذا عن الأحزاب "المعروفّتو".. فما بالك بالأحزاب "المجهولّتو"؟!.. دا أنا أعرف حزب ما فيهوش غير نّفّر واحد.. هو رئيس الحزب وهو الأمين وهو العضو الأوحد الذي يحمل كارنيه الحزب.. أما باقى الأعضاء فعلى الورق.. وورق ورق عقلى اتحرق..
تقولى ده حزب إيه أقولك حزب "النصر".. تقولى بيعمل إيه أقولك رئيسه مش موجود في مصر.. وخُد عندك حزب الإصلاح وحزب النهضة وحزب العدل وحزب الأصالة وحزب الفضيلة.. الله يرحمك يا أبلة فضيلة.. كلها أسماء ليست على مسمى.. سلمونتا كونتا يا فونتا..
لأ وعندك حزب "التكافل الاجتماعى" وآه يا دراعى يا عيني يا دراعي.. ودا بيكفُل مين بقى يا عم الاجتماعى؟!.. طب حزب "التغيير والتنمية" ده بقى بيغير إيه يا حلولى.. يكونش لسه بيغير هدومه؟! هِق هِق هِق
دى أمريكا بجلالة قدرها فيها حزبين ليس إلا.. وإحنا ما صدقنا البلد بقى فيها ثورة فقوم كل واحد معاه قرشين يجرى يجمع 5000 توكيل ويعمل حزب للزمن!!
وكفاية عليكو كده.. وسلامو عليكوووووووووو