كلمة السيسي في قداس عيد الميلاد بكاتدرائية العاصمة الإدارية

البابا تواضروس: السيسي وعد فأوفى في بناء كاتدرائية العاصمة الإدارية
زار الرئيس عبد الفتاح السيسي مساء اليوم مقر كاتدرائية "ميلاد المسيح" في العاصمة الإدارية للمشاركة في الاحتفال بعيد الميلاد، وتهنئة البابا تواضروس الثانى، بطريرك الكرازة المرقسية والمسيحيين بعيد الميلاد.
وصافح الرئيس السيسي البابا وكبار رجال الكنيسة والقيادات الدينية المسيحية.
وأعرب السيسي عن أطيب تمنياته لقداسة البابا ولجميع الأخوة المسيحيين بالصحة والسعادة ولوطننا الغالي بدوام التقدم والازدهار مؤكدا تماسك النسيج الوطني بين أبناء هذا البلد العظيم بمسلميه ومسيحييه.
كما شدد الرئيس على أن روابط الأخوة والمحبة التي تجمع بين أبناء شعبنا العريق أقوى وأوثق من أي قوى داخلية أو خارجية تريد أن تعرقل مسيرة العطاء والإنجازات التي تشهدها مصر خلال السنوات الماضية.
وقال الرئيس: أتقدّم بخالص التهنئة للشعب المصري بمناسبة عيد الميلاد المجيد، أعاده الله على مصرنا الحبيبة باليُمن والبركات.
وأضاف الرئيس: الافتتاح الجزئي للكاتدرائية النهاردة، ده رسالة كبيرة أوي من مصر، مش بس للمصريين..لأ.. ولا حتى للمنطقة.. ده للعالم كله.. رسالة سلام.. ورسالة محبة.
وتابع الرئيس: إحنا بفضل الله سبحانه وتعالى بنقدّم نموذج للمحبة والسلام بينّا وبين بعضنا.
وقال: هتخرج المحبّة وهيخرج السلام من مصر.. هيعُمّ العالم كله..
وتابع الرئيس: صدّقوني.. دايمًا بكرّر وبقول: عُمر الشر وعُمر الخراب وعُمر التدمير وعُمر القتل.. لا يمكن يقدر أبدًا يهزم الخير والبناء والمحبة والسلام.. لا يمكن.
وقال : يا ترى المحبة.. يا ترى الفرحة اللي إحنا شايفينها دي.. تساوي كام.. تساوي إيه، ليه إحنا مش شايفين الخير والسعادة بينّا وبين بعضنا.. ليه إحنا مش شايفين غير الأذى.. خلّي بالكم.. إنتم أهلنا.. وإنتم منّنا.. وإحنا واحد.. ومحدّش أبدًا أبدًا هيقدر يقسّمنا.. أبدًا.. مش عايز أتكلّم في أي آلام.. الآلام بتؤذينا كلّنا.. أنا سعيد إن إحنا موجودين هنا.. وموجودين وإنتوا فرحانين كده.. ويارب يقدّرنا إن احنا ندخّل الفرحة على كل الناس في مصر.. كل الناس.. بدون تمييز.. كل الناس.. أنا بشكركم على حفاوة الاستقبال.. تحيا مصر بيكم.. تحيا مصر بالمصريين.. تحيا مصر بالمصريين.
واختتم: كل سنة وإنتوا طيبين.. وعام سعيد عليكم وعلينا وعلى الدنيا كلها.