كلمة الرئيس السيسي في قداس عيد الميلاد بكاتدرائية العاصمة الإدارية الجديدة

ألقى الرئيس عبد الفتاح السيسي، كلمة مقتضبة خلال حضوره قداس عيد الميلاد بكاتدرائية "ميلاد المسيح" بالعاصمة الإدارية الجديدة.
ودخل السيسي فور وصوله قاعة الصلاة بصحبة البابا تواضروس الثاني بابا الإسكندرية وبطريرك الكرازة المرقسية.
واستهل السيسي كلمته ب"اسمحولي إني أقولكم وقداسة البابا وكل الأشقاء والأهل ولكل مصر والعالم كل عام وأنتم بخير".
وأضاف: "وكمان مهم أوي إننا نهنئكم للافتتاح الجزئي للكاتدرائية، والافتتاح ده رسالة كبيرة أول من مصر مش بس للمصريين ولا المنطقة بل للعالم، رسالة سلام ومحبة.. إحنا بفضل الله سبحانه وتعالى بنقدم نموذج للمحبة والسلام بينا وبين بعضنا.. وهتخرج المحبة والسلام من مصر وسيعم العالم كله".
وتابع: "صدقوني أنا.. يمكن أنا تقولوا معقول يبقى فيه كده.. طبعًا فيه كده.. ليه هيبقى فيه كده، عمر الشر وعمر الخراب والتدمير والقتل لا يمكن يقدر يهزم الخير والبناء والمحبة السلام.. لا يمكن".
وأضاف: "انا عاوز أقول الناس اللي بتتفرج علينا دلوقتي يا ترى المحبة والفرحة اللي شايفنها تساوي كام وإيه، ليه إحنا مش شايفين الخير والسعادة بينا وبين بعضنا.. ليه مش شايفين غير الأذى"
وتابع موجهًا حديثه للأقباط: "خلوا بالكم أنتم أهلنا ومننا واحنا واحد ومحدش أبدًا هيقدر يقسمنا أبدًا".
وأضاف: أوعوا زحمة الأحداث والآلالم تنسينا الفرحة اللي عايشنها.. أنا مش عايز أتكلم في أي آلام.. الآلام تأذينا كلنا".
وتابع: "أنا مش عايز أطول عليكم علشان صلواتكم.. أنا سعيد إننا موجودين هنا وانتم فرحانين كده ويارب يقدرنا ندخل الفرحة على كل الناس في مصر.. وبشكركم على حفاوة الاستقبال.. تحيا مصر بالمصريين.. وبقولكم محدش هيقدر على مصر طول ما مصر كده (ملوحًا بقبضة يده).. أوعوا تنسوا.. اللي عايز يأذينا بيفرق بينا وده مش هيحصل".
واختتم السيسي كلمته: "كل سنة وانتم طيبين وعام سعيد علكيم وعلى الدنيا كلها، وكل سنة وأنت طيب يا قداسة البابا".