أبو طقة يكتب: «حمدين صباحي» هو اللي اكتشف الجاذبية الأرضية وليس «نيوتن»

طبعا اللي يقرأ العنوان ده هيبقى عايز ينط في كرشي.. وكل واحد هيطلع لى بكتاب المدرسة بتاعه ويقول لى شوف يا عم «أبو طقة» أهه.. نيوتن هو اللي اكتشف الجاذبية الأرضية وهذا ما تعلمناه في المدارس وكمان في الجامعة.. وأنت بقى حضرتك جاي بعد السنين دي كلها تقول لنا إن صباحي هو اللي اكتشف الجاذبية الأرضية؟!
لكن أنا بقى هرد عليكم وهفكركم بمقدمة كتاب «أصل التاريخ من مصر للمريخ» اللى بتقول إن ليس كل ما قرأتموه في كتب التاريخ الدراسية صحيحا.. فقد تمت كتابته حسب أهواء مؤلفيه أحيانا ولإرضاء حكامهم أحيانا أخرى وقليلا منهم الصادقون.
فكتب التاريخ التي ألفها العرب أكدت أيضا أن العلماء المسلمين هم من قاموا باكتشاف الجاذبية الأرضية قبل «نيوتن» بمئات السنين ومن غير تفاح أصلا.. ثم بعد ذلك نُسب الاكتشاف لنيوتن.. وتم تأليف حكاية له من نسج خيالهم.. قال إيه تفاحة وقعت على رأس أم اللى جاب أبوه وهو قاعد تحت الشجرة.. وقال إيه قعد يفكر في التفاحة إزاى وقعت على الأرض بدون أن يسقطها أحد.. يبقى أكيد فيه حاجة بتشدها لتحت.. وفضل يبص حواليه ملقاش حد أو أي شيء ممكن يكون هو اللي شدها لتحت.. فقال لنفسه يبقى أكيد الأرض هي اللى شدتها لتحت.. طب الأرض مالهاش إيدين تشد بيها.. يبقى أكيد جذبتها لتحت بقوة خارقة.. وأخذ يفكر ويفكر حتى توصل إلى أن الأرض بها جاذبية ولولا كدا مكنش ينفع نمشى عليها بدون أن نتطاير في الجو.
طب بالله عليكم دا كلام يدخل دماغ أي حد عاقل؟!.. طبعا لأ.. بعكس حمدين صباحى الذي قال قبل خوضه انتخابات الرئاسة «يا أرض اتهدى ما عليكى قدى»، وقال أيضا «أنا سأخوض الانتخابات الرئاسية وقدمى ثابتة على الأرض»، وبتفكير بسيط هتلاقى إن حمدين اكتشف أن قدمه ثابتة على الأرض بحكم الجاذبية الأرضية اللي اكتشفها منذ نعومة أظافره لدرجة أنه اعترض على كلام «أنور السادات» رئيس الجمهورية وهو ما زال طالبا يتحسس خطاه بقدمه الثابتة على الأرض.
دا طبعا بالإضافة إلى أن نيوتن ولد عام 1643 يعنى مكنش فيه تفاح أصلا ولا كان حد اخترعه من الأساس.. بينما حمدين اتولد سنة 1954 يعنى بعد نيوتن بأكثر من 300 سنة.. يعنى كان فيه تفاح وموز وعنب وبلح الشام كمان.
ثانيا نيوتن دا كان طفلا معقدا لأن أمه تزوجت رجلا غير والده وتركته ليتربى على يد جدته العجوز.. بينما حمدين نشأ في أسرة مستقرة بين أمه وأبيه الحاج عبد العاطي صباحي.
وثالثا نيوتن مكنش متزوج ولا كان فيه واحدة عايزة تعبره وتعيش معاه بعكس حمدين اللى اتزوج وخلف دا غير أنه كان شاب روش ومقضيها قبل الزواج.. بس للأمانة الراجل كان بيحب الرومانسية مش اكتر علشان ما نتفهمش غلط.
أما رابعا بقى فنيوتن مات وهو نايم.. طب بالله عليكم.. فيه حد عالم بقانون الجاذبية ممكن يموت وهو نايم؟.. بينما حمدين مش ناوى يموت إلا بعد أن يصل لمقعد رئيس الجمهورية.
خامسا بقى والأهم أن نيوتن كان فقيرا ومش لاقى ياكل أصلا وبيشتغل علشان يكمل تعليمه.. ولو كانت التفاحة سقطت عليه من الشجرة اللى في الجنينة بتاعت أمه.. يبقى كان فقيرا إزاي بينما أمه تمتلك حدائق تفاح وعنب بناتي؟!.. يعنى حاجة ما تدخلش العقل.. بعكس حمدين اللى كان متربى في الفلاحين وأشجار الفاكهة على جانبى الطريق على طول مشواره للمدرسة.. يعنى أكيد حد من أصحابه عزمه في الغيط بتاعه وكان فيه شجرة تفاح وقعت على دماغه.
إذًا هو حمدين ما فيش غيره اللي اكتشف الجاذبية الأرضية وبدون تفاحة أصلا! ولو عايز تقرأ القصة كاملة وتتأكد أن حمدين هو مخترع الجاذبية الأرضية وليس نيوتن.. اقرأ كتاب "أصل التاريخ من مصر للمريخ" الجزء الثاني صفحة 1400 وحتى صفحة 1670.