هتكلم عن رانيا يوسف يا باشاوات

بعد نشر مقالى الأول فى فيتو فوجئت بعدد من الاتصالات والرسائل التى أرسلها إلىّ بعض المعارف والتى اتهمنى البعض من خلالها أننى من راكبى الموجة وأن ما كتبته عن علاقة الإخوان ببوجى وطمطم ما هو إلا محاباة لبعض الشخصيات المهمة فى حياتى والتى تتحكم فى مستقبلى المهنى.
وقد نصحنى أصحاب هذه الرسائل بالعودة لصفوف صحفيى الفن مرة أخرى وترك السياسية لأصحابها كما أنهم اتهمونى بعدم قدرتى على الكتابة باللغة العربية الفصحى لذلك كتبت مقالى الأول بالعامية ولهذه الأسباب قررت أن أستجيب لنصائح هؤلاء الأشخاص وأترك السياسة وأتحدث فى هذا المقال عن رانيا يوسف وأن أترك العامية وأكتب بالفصحى.
بس قبل ما اعمل كده عايز أفك نفسى بكلمتين وأوجه رسالة شكر للنظام الحالى.
انا عايز أقول بس شكراً ياباشاوات أنا الحمد لله شاب مصرى عندى 26 سنة اتجوزت بعد لما حكم السيد الرئيس الجديد على طول، وقاعد فى شقة الحمد لله تمليك .... آه أمال إيه يابشاوات .. مش إيجار ولا حاجة . ومراتى هى البنوتة اللى حبيتها وأنا صغير مضاعتش من قدام عينى ولا خدها حد غيرى عشان أنا فقير ومش لاقى آكل لا أنا ولا اللى اتجوزتها أمال إيه.
والحمد لله أنا عندى عربية آخر "ألاجة " أى نعم هى بالتقسيط بس مرتبى الكبير بيكفى إنى أدفع القسط منه، والحمد لله الكهربا والمية والزبالة زى الفل، بس والنبى ياجماعة متخلوش بتاع الزبالة يخبط علينا بدرى انتو عارفين بقة أنا عريس جديد والمدام بتقلق من التخبيط.
معلش بقى يا باشاوات اعذرونى أنا كنت غلطان لما اتكلمت فى السياسية المرة اللى فاتت، وأتكلم ليه أصلا وأنا واكل وشارب ونايم فى البلد دى ببلاش؟! مكنش عندى حق، شكراً يامسئولين وربنا يديم المعروف ويخليكو لينا.
آه أنا نسيت والله أتكلم عن رانيا يوسف النهاردة ومش هقدر أتكلم دلوقتى عنها معلش عشان قالوا ليا فى الجرنال إن المقال لا يزيد على 350 كلمة، هخلى رانيا للمرة الجاية وعليكم خير... أنا كنت ناسى إيه؟؟ ناسى إيه؟؟ ااه افتكرت عايز أقولكم بس " يسقط يسقط حكم المرشد " سلامو عليكو.