محمد بن راشد آل مكتوم وهو لا يتمالك نفسه من كثرة الضحك: هههههههههه والله ياشيخ حمد المصريين زبّطوكم، والعالم العربى كله ضحك عليكم لما شبع ضحك، لسه من شوية أبو متعب خادم الحرمين الله يمسيه بالخير قافل السكة معايا، وقال لى إنه كان هايبكى من شدة الضحك على أوبريت «قطرى حبيبى»، الواد باسم يوسف دا مرة خطير، والله بنفكر نعطى البرنامج تبعه الحملة الدعائية لشركة إعمار للعقارات، الولد مبدع ويستاهل. الأمير حمد بن خليفة - وهو يحاول أن يتمالك نفسه من شدة الغيظ: والله هذا الولد أراجوز ومأجور ودمه ثقيل، ولا عنده إبداع ولا بطيخ، ايش يعنى سارق أغنية عبد الوهاب العظيمة ومركب على ألحانها كلام بايخ، ثم مين هو أصلا.. وأكبر راس فى بلده بتيجى تقف على بابنا عشان تشحت مننا.. ويا نعطيهم يا ما نعطيهم على حسب مزاجنا. محمد بن راشد آل مكتوم زيادة فى مكايدة بن خليفة: والله صحيح قالها باسم، وعدتوهم بفلوس.. والرجال طلب «ديليفرى».. وبعدين ألغى الطلب لما رجعتوا فى كلامكم.. مسكين ما تعشى فى ذاك اليوم هههههه.. وانتم الغيتم القروش ليش يا شيخ.. خير .. الخزينة فاضية يا سمو الأمير.. قول لنا يا رجال نبعث لك كام مليار من عندنا تعطوهم إياهم.. خلوا باسم يتعشى ..غلبان فقير الله يحنن عليه.. ههههههههه. حمد بن خليفة: لا والله احنا أمورنا تمام.. وقد كلفنا صحفى كبير تبعنا يرد على هذا الأراجوز وبلده كلها.. وقريبا جدا باتصل عليك عشان نضحك عليهم. وفى اليوم التالى: الصحفى أحمد على القطرى يتطاول على مصر قائلا: «فى اليابان قاعدة أمريكية وفى ألمانيا أيضًا وكذلك كوريا التى ربما يكون هاتفك مصنوع فيها.. فماذا صنعتم أنتم غير أقراص الطعمية؟ إنك تعيشين فى عقدة الماضى يا نفرتيتي، بينما العالم المعاصر يخطط للمستقبل، وهذا سبب مشكلتكم أنكم تنظرون للوراء وليس للأمام». وبعدها بيوم أمير قطر يتعمد إذلال رئيس وزراء مصر ويرسل له وزير الثقافة لاستقباله بالمطار، وقطر تقدم مساعدات إضافية لمصر بقيمة 3 مليارات دولار فى صورة سندات أو وديعة بفائدة قدرها 4.8%، ويشترطون إدراجها فى البورصة المصرية حتى يمكنهم التخلص منها بالبيع فى أى وقت. مرسى لهشام قنديل: الجماعة هزأوك وبعتولك وزير الثقافة يستقبلك فى المطار.. أنا لو منك ما كنتش نزلت من الطيارة. قنديل وقد كاد أن يصدر صوتا غير مستحب من أنفه: يا سلام.. ما عملوها فى فخامتك قبل منى فى القمة اللى فاتت دى علطول.. وجنابك نزلت عادى يعنى.. وان كنت ناسى أفكرك.. ومع كده لا تعايرنى ولا أعايرك الهم طايلنى وطايلك.. وبعدين كله يهون عشان خاطر البلد.. عشان مصلحة مصر وشعبها الأصيل. مرسى يأخذه فى حضنه والدموع تنهمر من عينيه وهو يقول: مصر يا حبيبتى يا مصر. وبعد هذا المشهد الدرامى المؤثر، يسأله مرسى بعدم اكتراث: طيب والعالم القطريين الغلابة دول هايخدوا فوايد القرض بتاعهم دا منين ؟! ولاّ ها يطولوه هو نفسه تانى إزاى ؟ والله صعبانين عليا خالص، مش عارفين إن النص مليار اللى هايفضل بعد ما نوزع الباقى ع الأهل والعشيرة مش هايكفى الشعب الجعان ده غير 10 أيام! قنديل: سيبهم ياريس يستاهلوا، بيحسبوا نفسهم آخر فكاكة ومسرحين علينا واد صحفى صايع بيقول علينا بتوع طعمية، طيب وحياة الشيخة موزة لا نبعت لهم الفوايد بتاعتهم أقراص طعمية، ولو حبوا يبيعوا السندات مين هايشترى بضاعة خسرانة ومالهاش لازمة! مرسى متهللا: أيوه كده يا إتش، وماتنساش وحياتك تبعت لهم أقراص الطعمية نية، عشان زى ما انت عارف مافيش زيت، ويبقوا يقلوها همّ بمعرفتهم بقى.
