افرض جدلًا!!

إن ربنا كرمك بعزومة عند واحد صاحبك، وبمجرد وصولك رأيت اللحمة، قلت لنفسك: وحشتينى قوى يا غالية.
وفجأة ظهر الرومى وهمست لنفسك: إنت لسة عايش!!.. وصاحبك يتكلم معاك فى أحوال الدنيا وانت سرحان فى ملكوت تانى، يا ترى تبدأ بإيه؟! وكمان الحمام المحشى، إيه يا عم ده كله، وتقول لنفسك: عشان انت طيب وابن حلال ربنا كرمك بالعزومة دى.. عيش.
وصاحبك عمّال يزن بكلام فى السياسة والإخوان وانت تقول لنفسك: إخوان مين وسياسة مين.
سيبنى بس على الرومى والحمام، ونحلّى باللحمة، وظهرت الفواكه، وتصرخ فى سرك وتقول: يا ابن المحظوظة، هى دى العزومة اللى تستاهل يارتنى جبت العيال معايا، معلهش المرة الجاية.
وصاحبك أكل ودانك من الكلام.
وانت: يا عم اخلص، مش وقته خالص، أبوس على إيدك قول للمدام كفاية، أنا هيغمى عليّا، اخلص ياعم اللتّات.
من حقك، لازم تتكلم، ما انت شبعان من الغوالى "اللحمة والرومى "والحمام"!!!
وصاحبك قام دخل المطبخ وطلع وبص لك جامد، وانت إيدك على قلبك: خير.. انت رجعت فى كلامك ولا إيه.. وتكلم نفسك: معلهش هو المنحوس منحوس، وعشان تصبّر نفسك قلت: الحمد لله إنك شوفتهم، هتنهب؟!! النهاردة فرجة والمرة اللى جاية أكلة.
لكن صاحبك قطع تفكيرك: اتفضل، معلهش حاجة مش قد المقام، تبتسم وتقوله: يا راجل عيب، هى الحاجات دى بينا برضه؟!!
على رأى أمى الله يرحمها: بصلة المحب خروف، ويعتذر صاحبك: معلهش الراجل بتاع الكباب عملها معايا ومابعتش الكباب والكفتة، معلهش.
ولسة هتقول: بسم الله، وتلاقى الكهربا قطعت.
لو انت مكانى تعمل إيه!!