أبين زين

الرمل بيقول لكم كيلو السمك بجنيه.. وكيلو اللحمة المشفِّى باتنين ونص جنيه.. لكن بقى الفول المدمس سعره عشرة جنيه.. لكل كبشة وحبة زيت وملح عليه.. إيه رأيكم الكلام واضح بدون تفسير.. والسوق نظامه اتقلب فيه برمجه وتغيير.. الغالى يرخص بدون زفة ودون تبرير.. وفيه كمان تسهيلات تانية بشكل كبير.. الكيلو مانجة بخمسين قرش والتسعير.. على كل سلعة بدون خدعة ولا تزوير.. والناس بتصرف فلوس ملايين بدون تبذير.. والكل أصبح غنى ومفيش في مصر فقير.. أنا أصلى عايش وشايف كل شيء في البير.. وأقدر أقول كل شيء في كل أمر عسير.. وكل شيء ابتدا يظهر لدى الجماهير.. بديمقراطية وحرية وفكر منير.. مساواة ما بين الجميع لا حرب ولا تدمير.. ولا تنظيمات مرعبة لدواعش التكفير.. فجأة لقيت زوجتى بتقول اصحى يا سى فريد.. إنت بتحلم بأشياء كلها تغاريد.. والبيت مفيش فيه رغيف ولا فول ولا عناقيد.. من العنب اللى نفسك فيه وله بتريد.. أنا قلت طيب سبينى أحلم كأنى في عيد.. حتى كمان حلمنا أصبح عجيب وبعيد.. وخايف الفول كمان يهرب وسعره يزيد.. إيه رأيكم لو انام واحلم بحلم جديد.. لأنى والعيال عشقنا الفول وطبقه أكيد.