دعاء حماقى ساعة الإفطار .. "يارب أتجوز" !

يا تري إيه أخبار شهر رمضان عند محمد حماقي .. ؟! عايش إزاي وبيفكر في إيه وراضي عن نفسه وعباداته ولا حاسس إنه مقصر ؟! ذهبت إليه وكان " قافل علي نفسه " تماماً ، سألته عن السبب فقال: عاوز أركز مع رمضان، فاكر زمان لما كنا نحلق شعرنا قبل الامتحانات علشان نركز في المذاكرة، انا قررت إني اعمل كده في رمضان السنه دي !! .
إيه أخبار رمضان معاك؟
الحمد لله السنه دي قبل رمضان كنت خارج من الألبوم وحفلة مارينا ومضغوط جدا وعندي زحمة شغل جامدة وجيت عند رمضان وقلت لياسر خليل مدير أعمالي "أنا مش عاوز أشتغل في رمضان خالص"، والحمد لله أنا لحد دلوقتي ماشي كويس .. صيام وصلاة وتراويح ، وأنا شايف إن المفروض أكون كده على طول، والواحد يكون محتاجاً للتركيز في الصلاة والصوم والحمد لله إني لحد دلوقتي قادر أعمل كده.
نظام يومك في رمضان إيه؟
أنا أصلي الفجر وأقرأ قرآن ثم أنام، أصحى قبل العصر علشان أصلي الظهر ، بعد العصر أتفرج على التلفزيون شوية ، بعد كده أفطر، وبعدها أتفرج على التلفزيون تاني، بعد كده أنزل أصلي العشاء والتراويح وأرجع من التراويح أقابل أصحابي سواء عندي أو عند واحد منهم، ونتسحر مع بعض ويلف اليوم تاني.
##
إيه اللي بتابعه في التلفزيون ؟
مفيش حاجة متابعها قوي، لكن بحكم الوقت اللي بقعد أتفرج فيه توجد أشياء معينة أتابعها، مثلا مسلسل "اللص والكتاب" أشوفه قبل الإفطار، وهو مسلسل جميل ودمه خفيف، سامع عن مسلسل الجماعة وشفت منه بعض الحلقات، كمان بشوف مسلسل يحيى الفخراني "شيخ العرب همام" وهو بيعرض بعد الإفطار على طول، لكن بشكل عام أنا مش متابع جيد للتلفزيون بسبب إني مركز أكثر مع العبادات، بعد المغرب بشوية تلاقي نفسك خلاص هتنزل تصلي وتخلص الساعة 11 فمفيش وقت لأي حاجة.
##
وزنك بيزيد في رمضان ؟
وزني بيزيد في رمضان لو مخدتش بالي، لأني باكل في مواعيد، أنا أخدت راحتى اول 10 أيام وبعدين ابتديت أول إمبارح " ألم الحكاية " ، السحور مايبقاش تقيل يعني.
بتاكل اكتر في السحور ولا الفطار؟
اللي بيتخن أكتر السحور، فيه حاجات كثيرة بتحصل بعد الإفطار فبيبقى فيه مجال لحرق الدهون، أنما السحور هو اللي يزود الوزن، فبدأت دلوقتي إني اتسحر زبادي مع طبق الفول طبعا.
##
فيه أكلات معينة بتحبها في رمضان؟
في رمضان سبحان الله كل الأكلات يصبح ليها طعم، بس فيه حاجات انا بحبها بشكل خاص زي الملوخية وورق العنب والرقاق باللحمة المفرومة، وطبعا في السحور طبق الفول المتين اللي بيظبط اليوم كله، كمان أحب أشرب تمر هندي، أكتر من قمر الدين لأني ماليش تقل عليه، وبحب التمر يكون سكره مش كتير ويكون "مزز"، وبالليل كوب "الشاي باللبن" أساسي.
ماجيبتش سيرة الحلويات ؟!
الحلويات في حدود، بس بحب الكنافة جدا، وأمي بطلة العالم في الأكل، بتعمل اكل حلو قوي، وبتعمل كنافة وقطايف حلوة هايله، فدول يمكن بعيش معاهم أول 10 أيام لكن من دلوقتي اعتبرني نسيتهم خلاص.
##
وايه اخبار العزومات؟؟
إتعزمت كتير، يمكن 6 أيام أفطرت خارج البيت، لكن إن شاء الله الأيام اللي جاية سأفطر في البيت أكتر، أنا قاعد لوحدي لكن أول 4 أيام رحت أفطر عند أمي خصوصا إن طارق أخويا لسه جاي من السفر، فكلنا بنفطر مع بعض، وبعد كده أفطرت مرة عند ياسر خليل ومرة عند أمير طعيمة وكده..
يوجد دعاء معين تحرص على تكراره في رمضان؟؟
بصراحة أنا مش بشوف إن هناك صيغة معينة في الدعاء مهم تلتزم بيها قد ما هم إنك تقول اللي في قلبك، زي ما بيطلع منك، تشوف إنت عاوز إيه ومحتاج إيه ويبقى عندك مساحة وقت في الصلوات إنك تكرر هذا الدعاء، يعني التراويح مثلا بنصلي عشرين ركعة، فتلاقي نفسك بتقرأ قرآن كتير وبتختم القرآن في رمضان وهناك دعاء ختم القرآن ، لكن في العادي طول الوقت بدعي.
##
إيه الدعاء اللي بتلح على ربنا بيه؟؟
على فكرة ربنا بيحب أنك تلح عليه بالدعاء، أكتر حاجة بدعي بيها " ربنا أتنا في الدنيا حسنة وفي الآخر حسنة وقنا عذاب النار" ، بقوله في كل سجدة، وربنا يسترنا في الدنيا ويدينا رزق حلال ويسهل لنا حياتنا ويخلينا دايما على طاعته ويسهلها لنا لأنها مش سهله قوي، فأنا بدعي دايما ربنا انه يسهل لنا طريق الطاعة وييسر لنا الطريق السليم، فيمكن ده هو دعائي الذي اكرره.
وما الدعاء الشخصي ؟
يارب عاوز أتجوز، ربنا يرزقني بواحدة بنت حلال ، يمكن دي الحاجة اللي اليومين دول نفسي فيها.