مي عز الدين : رمضان بالنسبة لي " صلاة ونوم وتلفزيون وبيت " !

هي في حياتها العادية مثل أي بنت .. أحلامها بسيطة ودنيتها غير معقدة، تحب البيت وتكره الزحام الذي لا تستطيع أن ترتاح فيه وتكون على طبيعتها، رمضان هذا العام عند مي عز الدين مختلف تماما، إعرفوا ما فعتله في الأيام الماضيه وخطتها في العيد في السطور القادمة..
حوار: شريف بديع النور
ما المختلف في رمضان هذا العام ؟
لأكثر من عام سابق كنت انشغل بالتصوير في رمضان، وكان ده بيضايقني قوي لأنه كان يشغلنى عن ما تعودت عليه خلال رمضان ، وعلشان كده قررت أن أنتهي من التصوير قبل رمضان .. والحمد لله قدرت أعمل كده.
وما الذي تعودتي عليه في رمضان؟
رمضان بالنسبة لي عبارة عن صلاة ونوم وتلفزيون وبيت، أنا قليلة الخروج في الأيام العادية، أما في رمضان فأنا قليلة الخروج جدا.
كمان رمضان هذا العام نمت فيه كتير جدا، هقولك ليه: انا عندي مشكلة، انا " مابنامش " وانا بشتغل، حتى لما تكون مواعيد الشغل مريحة أنا " مابيجيليش نوم " من القلق، وكمان العبادات والجو الروحاني في رمضان يمنحنى راحة نفسية تجعلني أنام أحلى نوم لأن نفسيتي تكون مرتاحة وذهني صافياً .
إزاي بتعرفي ردود الفعل عن المسلسل؟؟
بطريقتين: الأولى أني بتفرج على المسلسل وسط أصحابي وعائلتي، وبقعد أراقب ردود افعالهم و التعبيرات على وجوههم وقت عرض المسلسل، لكن أنا لا أحب سؤال أحد فيهم عن رأيه، بالنسبة لي السؤال مالوش أي اهمية، لأن السؤال بنسبة 90 % أنا معتقدة إن إجابته هتكون "إنتي كويسه" ، ولو واحد منهم قال لي ملاحظاته مش شرط هيقولي كل حاجة، الأحلى عندي هو مراقبة المشاهد وهو بيتفرج، الحقيقة بتطلع على رد فعل الوجه أكتر..
أما الطريقة الثانية فهي عن طريق الفيس بوك، كل يوم بعد عرض الحلقة بدخل على صفحتي الرسمية عليه وهي mai" ezz eldin 4 fanz" وأشوف الجمهور كتب إيه عن الصفحة..
##
قلت أنك لا تحبي الخروج في رمضان، معنى كده أنك لا توافقين على دعوات الإفطار؟
انا لا أذهب لعزائم خارج البيت في نصف رمضان الأول، انا أعزم الناس عندي في البيت، لكن ماقدرش أخرج أول اسبوعين من رمضان، الأيام الأخيرة بدأت اقبل دعوات الإفطار والسحور، وبفضل إن اللي يعزمني تكون العزومة في بيته، أنا مابحبش جو الدوشة والخيم، بالنسبة لي أذهبه لمجرد الفضول فقط.
مين اللي عزمتيهم؟
فروع الأهل اللي مش عايشين معايا في البيت أخدو اول اسبوع، تاني اسبوع كان أصحابي الانتيم ودول في منهم مابعزمهمش .. لكن بيقيموا معايا طوال شهر رمضان، مثلا عندي واحده صاحبتي من الاسكندرية من أيام المدرسة واسمها مروة الفولي مقيمة معايا من أول شهر رمضان، أختي غير الشقيقة مش عايشة معايا في البيت لكن من أول رمضان جاءت وأقامت معي، كمان أساسي لازم أميرة فتحي وأحمد زاهر وهدى مراته ودول تبادلت الافطار والسحور معهم كذا مرة على مدار رمضان.
بتصحي الساعة كام؟
معنديش سيطرة خالص على الصحيان بدري حتى في رمضان، حاولت السنة دي أصحى بدري علشان أحس باليوم لأني كده مش بحس بالصيام، واللي قدرت أعمله إني مثلا اصحى على قد ما أقدر قبل الافطار بساعتين، أكتر من كده مابعرفش، لأن طبعي كبني آدمه إني مبعرفش أصحى بدري، كافحت علشان اصحى بدري ماعرفتش، ولما بصحى بدري مابقدرش أتكلم مع حد ، وبحب الهدوء فأقعد أسمع أوأقرأ قرآن .. ساعتها أقدر أتعامل مع الناس ، فأخرج من غرفتي أفطر معاهم وأكمل اليوم معاهم..
##
في أكلات معينة بتحبيها في رمضان؟
لأ أنا باكل معظم الحاجات، أنا مش شخصية متعبة في الأكل خالص، بس انا بحب أطبخ في رمضان، لكن رمضان ده اتفقت مع ماما اني مش هطبخ كتير لأن ليه عمل بيتعرض فمش فاضية، على فكرة اليوم اللي بطبخ فيه بيكون له استعداد خاص، بظبط المنبه وأصحى غصب عني.
قبل العيد بتعملي ايه ؟
ولا حاجة، ماخدتش اني انزل اشتري ملابس للعيد مخصوص، دي الحاجة الوحيدة اللي في حياتي اللي مش واخداها بشكل تقليدي.
طيب وانتي صغيرة كنتي بتعملي ايه في العيد؟
لأن والدي ووالدتي منفصلين فكنت أقضي العيد مع أهل والدي.
##
ايه الطقس اللي محافظة عليه في العيد من أيام الطفولة؟؟
بصراحة الحاجة الوحيدة اللي مش عارفه اتخلص منها من ايام الطفولة هي البمب، لغاية النهاردة لازم افرقع بمب مش عارفه ليه، مش مهم أجيب لبس العيد بس لازم أجيب بمب، ومجنونة بطلع أفرقع بمب في الشارع لحد دلوقتي!!
وإيه أخبار العيدية .. حد بيدي لك ؟
ماما.
وأنت بتدي حد ؟
لا، من وانا صغيرة متعوده إني أصغر واحدة في العيلة .. يعني " أخد وما بديش " !!
##