راندا البحيري تروي مأساتها مع الطيران الإماراتي

روت الفنانة "راندا البحيري" مأساتها مع الطيران الإماراتي في آخر رحلة توجهت فيها إليّ هناك لمشاهدة مباراة كأس السوبر المصري، وذلك عبر صفحتها الشخصية على موقع "إنستجرام".
وقالت "راندا"، "للأسف مكونتش عايزة أتكلم في الموضوع ده خالص بس اضطروني لكده، أنا محبتش في حياتي خطوط جوية قد ما حبيت الخطوط الإماراتية لكن للأسف يوم 15 فبراير حصل معايا موقف سخيف جدا، الكراسي كانت بايظة والكهربا فيها تهنيجة معلقة تماما، فكانت الكراسي بتتحرك لوحدها فجأة وتفتح فجأة وتقفل فجأة".
وأضافت: "الكرسي بتاعي من كتر ما كان بيتحرك وقع حاجاتي كلها ومنها الآيباد واتحسر زي ما انتوا شايفين ومكانش ينفع حد يطلع الآيباد من بين الكرسي علشان ممكن البطارية تتفاعل مع الكرسي والكهربا ويحصل حريقة وبسبب كده أنا قعدت طول الرحلة على الأرض واعتذرولي وقالولي إنهم هيصلحوا الآيباد ومن ساعتها بيبعتولي ايميلات كلها بتقول إنهم ملهومش دعوة وأنا المسئولة عن أغراضي الشخصية".
يذكر أن آخر أعمال "راندا البحيري" هو الجزء الرابع من مسلسل "سلسال الدم"، وهو من بطولة عبلة كامل ورياض الخولي وأحمد بدير وأحمد سلامة ورانيا فريد شرقي، ومن تأليف مجدي صابر وإخراج مصطفى الشال.