ساخرون: ما قاله أبو أفكار.. عن موضوع سحب القرار

سلماوى النبراوى مخاطبا المثقف الوطنى الكبير أبو زيد الهلالى سلامة على المقهى واللذان تعودا اللقاء عليه كل ليلة جمعة من كل أسبوع: بقى بالذمة ينفع الموقف المصرى العجيب اللى حصل في الأمم المتحدة ده في موضوع الاستيطان الإسرائيلى على أرض فلسطين المحتلة ؟! بقى ده اسمه كلام يا حاج أبو زيد يا راجل يا وطنى يا كبير ؟!!
أبو زيد الهلالى سلامة، موضحًا ما حدث من وجهة نظره: يا إخوانا موقف مصر من مشروع قانون إدانة الاستيطان كان واضح زى الشمس وهدفه الأصلى تجنب «الفيتو الأمريكي»، ومش ممكن ننسى إن مصر هي الشريك الرئيسى مع المجتمع الدولى في دعم القضية الفلسطينية.
المعلم هنداوى علطول سمسار المنطقة: يا سلام يا اخويا... بقى مصر كان هدفها إنها تبوظ الفيتو الأمريكانى برضه؟!! وهو ده كلام يخش النافوخ يا ناس !! أنتم عملتم زى العيال الخايبة اللى حدانا في الساقية «ساقية مكي» لما الواحد منهم يطلبوه في الجهادية؛ يقوم بخيبته عشان ما يخشش الجيش يروح قاطع صوبع من صوابع رجليه.. بالذمة في كده؟!!...
أبو زيد الهلالى سلامة موضحًا: الموضوع مش كده يا معلم هنداوى علطول، أنت فاهم الموضوع غلط خالص، إلا صحيح هم سموك هنداوى على طول ليه ؟
المعلم هنداوى علطول: ولو إن ده مش موضوعنا يا عم أبو زيد الهلالي، بس أنا هاريحك، بقى أنا زى ما أنتم عارفين ياإخوانا شغال سمسار، قوم جانى واد من شباب الجامعة المايصين دول، وقال لى إن هو عاوز شقة عشان يسكن جنب الجامعة، فأنا حليت له المشكلة دى على طول، انبسط جدا وكان عمال يقرقش في كيس شيبسى ومتمزج آخر مزاج، فأنا قلت له إيه ده ؟ يا حلاوة يا ولاد... كيس شيبسى يا سلام.. هو أنت من الشباب بتوع شيبساوى على طول ؟! فرد على وقال لى أنا شيبساوى على طول، وانت هنداوى على طول، وعنها وكل صحابه من ساعتها وهم بيقولوا لى ياعم هنداوى على طول، فطلع على موضوع هنداوى علطول ده... ارتحت يا سيدى؟!! وبعدين أهى أمريكا قلت مع إسرائيل بأصلها وامتنعت عن التصويت كسبتم انتم إيه بقى؟!!
أبو زيد مجاوبا: خلوا بالكم كمان يا جماعة إن في حاجة مهمة جدا عدت عليكم؛ وهى إننا سحبنا مشروع إدانة الاستيطان لأننا محبناش نخسر الإدارة الأمريكية الجديدة بسببه.. واحنا محتاجنها جامد في المرحلة القادمة ومحتاجين إلى دعمها للقضية الفلسطينية مستقبلًا أكبر من الآن، وكمان إحنا دورنا في رعاية القضية الفلسطينية والمفاوضات لا يستطيع أحد أن يزايد عليه، ومصر كانت ومازالت حريصة على خروج قانون إدانة الاستيطان ودعمه حتى نجاحه وتجنب الفيتو الأمريكى عشان كده ماكانش قدامها غير اللى عملته ده، عشان كده السلطة الفلسطينية وجهت الشكر للدبلوماسية المصرية على جهودها في دعم قرار إدانة الاستيطان، فأرجوكم ما تبقوش تفتوا بغير علم في أشياء كبيرة وعايزة معرفة بخلفياتها زى الموضوع الخطير ده..
المعلم أبو أفكار منهيا النقاش: والله يا جماعة أنا شايف إن الكلام بتاع الأستاذ أبو زيد الهلالى سلامة معقول ومية في المية إضافة إنه في حاجة مهمة جدا إنتم مش واخدين بالكم منها إن ربنا كده كده كاتب على اليهود الهزيمة، طيب بعد ما يتهزموا ويخفوا من فلسطين العالم الفلسطينيين الغلابة يفضلوا برضك بعد تحرير الأرض قاعدين في المخيمات الغلبانه بتاعتهم ؟ أظن ما ينفعش ! طيب يا عين أمهم هايلحقوا يبنوا مساكن ليهم إمتى طبعًا عايزين ولا عشرين ثلاثين سنة لحد ما يخلصوها يقوم ربنا مسخر لهم اليهود يبنوا في المستوطنات على عماهم وبفلوسهم عشان كلنا عارفين أنه لابد من يوم معلوم تترد فيه المظالم، أبيض على كل مظلوم وأسود على كل ظالم... فهمتم بقى مصر سحبت القرار في الأمم المتحدة ليه.. يا متعلمين يا بتوع المدارس ؟!!