«الشيخ برهامى» ل «سطوطة الفنجرى»: كان على عينى.. تجديد الخطاب الدينى

الشيخ ياسر برهامى حبيبى طبعًا.. وعلاقتى به ممتدة من زمان وياما عملنا حوارات تم نشرها في هذه المساحة.. تقريبا أنا الست الوحيدة اللى عمنا الشيخ بيدى لنفسه الحق أنه يعاكسها ويغازلها على عينك ياتاجر.. يعنى بيننا عشم.. بس ماهواش عشم إبليس علشان ماحدش يفهم غلط.
عمنا الشيخ ياسر زعلان منى علشان تقدمت بالتهنئة لصديقى «إسلام بحيرى» عقب خروجه من السجن.. قال إيه ليه وليه مُزة مُسلمة زيى أنا تهنئ واحد زنديق _من وجهة نظر الشيخ طبعا_ وتطالب الرئيس بالعفو عنه في أكثر من مناسبة.
الكلام دا أنا عرفته من الواد «نادر بكار» اللى كلمنى من أمريكا الخميس اللى فات.. حاكم إن بكار لازم يكلمنى كل يوم خميس ويحكيلى عن مغامراته أولا بأول.
إمبارح بقى اتصلت بالشيخ ياسر وقلت له: زعلان منى ليه ياغالى يامسمسم أنت؟!
قال: إنتى علاقتك إيه بالواد بحيرى ده ؟
قلت: بتسأل ليه بقى.. تكونش بتغير عليا ياراجل انت؟!
قال: والله أنا معرفش أنتم إزاى مسلمين.. ياناس حرام عليكم اللى بتعملوه في البلد ده!
قلت: ياعم الشيخ إحنا بنطالب بتجديد الخطاب الدينى.. فيها حاجة دى؟!
قال: هااااااااا أو.. كان على عينى تجديد الخطاب الدينى.. يابنتى دا كلام للاستهلاك المحلى وإلهاء الشعب.. ماحدش يقدر يجدد في الدين إلا على جثث السلفيين!
قلت: دى قصيدة أنت كاتبها يعنى ولا بتتكلم جد؟!
قال: الحاجات دى مافيهاش تهريج.. نحن السلفيين بوابة الدين وواجهة التدين.. فمن أراد الإسلام الحق فلا بد أن يطرق بوابتنا أولا.. لكن أمثال إسلام بحيرى والناس اللى بتطالب بتجديد الخطاب الدينى هؤلاء بوابات خلفية ليس لها شرعية دينية منطقية
قلت: لكن الرئيس السيسي نفسه بينادى بتجديد الخطاب الدينى يامولانا!
قال: ها؟! يعنى إحنا ممكن نجدد لكن بالراحة ياستى.. مش علاولة كدا!
قلت: يعنى هتعمل إيه يامان
قال: ولا حاجة ياستى طالما الريس عايز كدا يبقى خلاص.. «أطيعوا الله وأطيعوا الرسول وأولى الأمر منكم»
قلت: أيوه كدا كُل عيشك معانا!
قال: عموما أنا طالع أعتمر في السعودية ولما أرجع هيكون لينا كلام تانى نحون موضوع تجديد الخطاب الدينى ده!
قلت: يعنى الكلاد ده للنشر؟!
قال: لأ ياستى الله لا يسيئك.. متودينيش في داهية
قلت: لكن قلى ياعم الشيخ: هو صحيح السعودية عايزة تتصالح مع الإخوان؟!
قال: والله كلنا عايزين نتصالح مع الإخوان ياسطوطة يااختى.. إحنا اتلعب بينا الكورة ياسطوطة!
قلت: ماهو أنتم اللى بعتم الإخوان علشان تحافظوا على كراسى البرلمان!
قال: وندمنا على فعلتنا.. إنا غلطان اللى سمعت كلام بكار وبتوع حزب النور!
قلت: الكلام دا للنشر؟!
قال: لا ياستى أنا بفضفض معاكى.. يلا باى.. ولما أرجع من السعودية أكيد هيكون لنا كلام تانى!