ديالوج

فى نادى القضاة وعلى غير موعد.. التقى النائب العام القديم عبد المجيد محمود مع النائب الجديد طلعت عبد الله، وعلى فنجان قهوة "مظبوط" دار بهدوء بينهما هذا الحوار الخاص جدا.
عبد المجيد: إيه يا طلعت، ورقك من المكتب ولا لأ؟
طلعت: ورق إيه يا عبد المجيد يا أخويا، إنت ناسى إن الدستور فى صفى!
عبد المجيد: والحكم القضائى اللى أخدته، أعمل عليه شوربة عدس؟
طلعت: لأ، تعمل عليه حفلة رد شرف!
عبد المجيد: يعنى إنت شايف إنى مشيت بطريقة غير قانونية!
طلعت: بلاش إحراج يا سيادة المستشار إحنا كنا زملاء.
عبد المجيد: عارف، وعشان كده أنا طالب رأيك بشكل أخوى!
طلعت: فى إيه بالظبط؟
عبد المجيد: فى السؤال يا طلعت هو فيه غيره!
طلعت: طيب سيبك من السؤال وقوللى: هو صحيح إنت عملت تصريح للصحافة قلت فيه إنك مش ناوى ترجع؟
عبد المجيد: أجاوبك كزميل ولا على أساس إننا بنلعب الكراسى الموسيقية!
طلعت: بتكلمنى كأنى أنا اللى عينت نفسى فى المنصب!
عبد المجيد: ما أنت من شوية كلمتنى على إن أنا اللى شلت نفسى من المنصب.
طلعت: طيب نرجع تانى للزمالة والقهوة المظبوط.
عبد المجيد: القهوة مظبوطة لكن الجو كله مش مظبوط، وكأننا فى ماتش مصارعة لازم حد فينا احنا الاتنين يخلص على زميله عشان الجو يفضى له.
طلعت: يا ساتر يا رب احنا بتوع قانون!
عبد المجيد: المشكلة نفس القطتين فى بلدنا يا سيادة المستشار بقت أرخص، وأكتر من الطماطم والخيار المهم التطبيق!
طلعت: أنا حاسس فى نبرة صوتك شوية غمز ولمز!
عبد المجيد: أعوذ بالله!
طلعت: يبقى تعالى نفكر فى حل يرد لك كرامتك ويحافظ فى نفس الوقت على كرامتى أنا كمان.
عبد المجيد: عايز الحق ولا ابن عمه؟
طلعت: الحق طبعا
عبد المجيد: أنا مشيت ومش عايز ارجع إنت تمشى.. ويحيى نائب عام