نشطاء يسخرون من ارتفاع أسعار حلوى المولد.. حبيب: الخرزة الزرقا تجلب السمسمية والحمصية.. خالد: مطلوب شريك ياخد الملبن.. أيمن: دخلتك على الناس بكيسين سكر أحسن.. وأحمد: اللبس الشتوي والعلاج أهم

لا تزال علبة حلوى المولد من الأشياء التي يحرص المصريون على شرائها، للتعبير عن فرحتهم بالمولد النبوي الشريف، لكن هذا العام ومع زيادة أسعار الحلوى بسبب أزمة السكر، كان للمصريين وقفة معها، فالبعض قرر مقاطعة شراء حلوي المولد، ووصفوا تجربتهم بالمريرة وسط غلاء الأسعار.
حلوى المولد
أطلق عدد من نشطاء موقعي التواصل الاجتماعي "فيس بوك وتويتر" العنان لروح الدعابة المميزة للمصريين، فاستجلب أحدهم الساحر المغربي لجلب حلوي المولد، وآخرون طلبوا شركاء جادين لاقتناء علبة الحلوى.
شريك جاد
قال خالد مجد الدين: "نظرا لغلاء الأسعار.. مطلوب بجدية شريك في علبة حلويات المولد، يفضل من الجيران أو الأقارب، هاخد الملبن وياخد هوا الحمصية، ولكم جزيل الشكر"، وأضافت هبة رجب: "النهارده لقيت زحمه عند حلويات جنب بيتي اسمه اكسيبشن زحمه بجد لحلويات المولد احب اعرف مين عامل مقاطعه بقي.. ياله كل سنه وكلنا بخير ومصر بخير".
وعلقت دعاء غنيم: "بعد شوية جولات بين محال حلاوة المولد، لقيت إن زي ما فيه علب حلويات بأسعار مبالغ فيها إما نتيجة شكل العلبة المبهر وتصميمها الفخم أو نتيجة الجودة العالية جدًا للقطع اللي جواها، لقيت بردو إن فيه علب كارتون أسعارها معقولة وقطع الحلويات اللي فيها هي هي اللي كنا بنشوفها زمان واحنا صغيرين من غير أي تاتشات حديثة، وأقل طبعًا في الجودة.. ولقيت كمان إن فيه إمكانية إنك تشكل علبة على ذوقك بالقطع اللي تختارها.. معظم اللي بيشتروها بتكون إما إحياءً لذكرى ارتبطت عندهم بطقوس وعادات من العهد الفاطمي أو علشان يفرحوا الولاد".
اللبس الشتوي
قال أحمد محمد: "زمان بابا كان بيجيب علبه 3 كيلو والبيت كله كان بيجيب اصلنا بيت عيله بس دلوقتى حرام نجيب علبه ب 600 جنيه علشان ناكل ونفرح وناكل شوية سودانى مسكر وكمان انا بشفها من نظرى انها بدعه غير كده مفيش شغل يخلي الواحد يصرف فلوس في حلاوه في حاجات أهم ذى (اللبس الشتوى/ الاكل/ العلاج).. ربنا يرحمنا في الزمن ده.. وجهة نظر".
وأضافت هند عبد الله: "أنا في بيت أهلي كان دايمًا العلبة هي هي نفسها بتاعة كل سنة بس بنجيبها بالدور يعني السنة اللي فاتت خالو السنة دي انا اللي بعدها حد تاني، وهكذا كانت 3 كيلو وفيها كل الحاجات الفاخرة واغلي مرة جبناها كانت ب 150 جنيه السنة دي هي نفسها بدون أي تغيير ب 750 جنيه كنت نفسي اشتري ولو نصها عشان ذكرياتي مع أهلي بس السعر وقفني".
وردت سماح غريب: "أنا مقاطعة بسبب غلاء الحاجة طبعا ومفيش حاجة أسعارها مناسبة لأني في منطقة شعبية ولفيت حب استطلاع وغليت 3 أضعاف، وخصوصا إنها مش أساس الاحتفال بمولد الرسول عليه الصلاة والسلام.. كل عام وأنتم بخير".
تناقض
ذكرت عزة عاطف: "اللي يشوف الناس وهي بتتسابق على شرا حلاويات المولد وقاتلين نفسهم على المحال مايقولش ده شعب بيعاني من غلاء الأسعار وبيشتكي ليل ونهار كلنا بقينا حلوين اهو ومعانا نشتري علبة حلويات ب500 جنيه.. شعب متناقض بطبعه".
وأضاف الشيخ محمد سيد: "كنت في هذه الأيام من كل عام أعود اخواتى البنات وآخد لكل واحدة منهم علبة حلاوة من حلويات المولد تزن اثنين كيلو ونص وهم عددهم أربعة غير ذوى الرحم من العائلة وفقراءها من أهلي حسبة عشرون كيلو حلاوة كانو بقطعو على حسبة أربعمائة جنيه حلويات ممتازة النهاردة ثمنهم ألف وأربعمائة جنيه بسعر سبعون جنيه للكيلو كانت النتيجة انى أقسمت إلا اشترى هذا العام حلوى من أي نوع للكل وللحكومة الرشيدة كل الشكر والعرفان أنها وفرت لى الأموال لأنى بالعربى ملقيتش مع أي فلوس أشترى ولا حول ولا قوة إلا بالله العلى العظيم.. احنا أعلنا الصيام هو انت مش عارف مرتب الموظف في الأوقاف كام".
ورد حبيب المصري: " وصل...وصل.. وصل الآن إلى أرض مصر المحروسة الشيخ الروحاني الشيخ الروحاني لجلب حلاوة المولد في دقيقتين وجلب العروسة الحلاوة في ربع ساعة ولدينا الخرزة الزرقا لجلب السمسمية والحمصية وقلائد تحول الحلاوة الناشفة لملبن الشيخ الروحاني هو الوحيد القادر بإذن الله على تحويل قرص الطعمية إلى علبة حلويات 5 كيلو احذروا السحرة والمشعوذين.. الشيخ الروحاني هو الوحيد الحاصل على شهادة من الجمعية العالمية للنصب".
وتابع أيمن عشماوي: "نصيحة لكل واحد رغم الضغوط المادية اللي عايز يشتري حلويات المولد صدقني والله دخلتك على الناس بكيسين سكر احسن من أي علبة حلويات جرب وأنت هتشوف فرحة الناس".