بالفيديو.. شاهيناز تكشف أسباب ارتدائها للحجاب

قالت المطربة شاهيناز نجمة برنامج ستار ميكر، "إنها نشأت نشأة موسيقية فوالدها كان عازف عود ودرست الموسيقى هي وشقيقاتها، أما مسألة الحجاب فكانت حرية شخصية داخل العائلة ولم يُجبَر أحد عليها".
وتابعت شاهيناز، خلال حوارها ببرنامج "معكم" المذاع على فضائية سي بي سي تقديم الإعلامية منى الشاذلي، «كنت بشوف صورتي دايمًا بالحجاب من وأنا طفلة صغيرة، وترددت كتير في ارتدائه، وأجّلت ده أكثر من مرة وكنت بقول لنفسي لما أكبر طاب لما أتجوز وأخلف وبعدين كنت بحب قوي زي كل البنات اللبس والموضة والميكب».
وأضافت، أنها بعد الولادة شعرت بالخوف على ابنها لمروره بظروف صحية صعبة وقررت التقرب من الله لكنها لم تتخذ قرار الحجاب، قائلة «مكنتش خدت قرار الحجاب وقتها لكن وأنا بفكر في إني أتقرب من ربنا شوفت صورتي تاني بالحجاب فمقدرتش بقى لأني حسيت وقتها إني صغيرة قوي قدام قدرة وعظمة ربنا وقررت أتقرب منه لكن مش شرط التقرب بالحجاب بس ممكن بالصلاة والعبادات كتير وفيه ناس مش لابسه حجاب بس ممكن تكون عند ربنا أحسن مني دي حاجة منقدرش نحكم عليها».
وأوضحت شاهيناز، "اعتزالي ليس له علاقة بالغناء، وقت ما تحجبت مكنش جوايه تأكيد إني هكمل في الغنا ولا لأ بس إحنا كمجتمعات عربية بنربط دايما بين اعتزال المطربة وحجابها يمكن شكل الممثلة المحجبة الناس اتعودوا عليه لكن المطربة مش نفس الوضع وكل اللي حصل إني عمري ما أعلنت الاعتزال أنا بس وقّفت الغنا فترة".