صندوق العجب

قرب.. قرب.. تعالي وشوف العجب.. في صندوق الدنيا..آلا أونه.. ألا دويه.. ألا تريه.. مزادات.. مزادات.. مش على كرسي ولا على دولاب..لا.. على خلق الله.. يلمح الراجل بتاع صندوق الدنيا بيه.. ينادي عليه.. ماهو جعان.. وشقيان من الصبح محدش جاله ولافاضي يبص في صندوقه.. تعالي.. تعالي يابيه.. حوريك العجب.. دول كبيرة يابيه بتلعب الكورة بشعوب كاملة وبكل غطرسة تقرر دا يموت.. ودا يعيش.. والبلد دي تتقسم.. ودوّل يطردوا من بلادهم مكان ميلادهم وأمنهم وأمانهم..
يرد البيه.. أهم بعيد عننا حتقرفني لِيه.. متوجعش دماغي عندي معاد مع دكتور الكلب بتاعي.. يفكر بتاع صندوق الدنيا في حكاية تانية تعجب البيه.. يقف راجل غلبان أمام صاحب صندوق الدنيا..يا عيني بابني بيموتوا الناس.. ويطردوهم من بلادهم.. وبيروحوا فين الغلابة دول ؟!
لا يهتم به بتاع الصندوق فهو طمعان في جيب البيه.. وباستماتة وقد فكر في فكرة ليها العجب حتخلي البيه يطلع خمسة جنيه.. يا بيه والنبي ماتمشي..يحاوريلك حاجة جديدة.. آخر تقليعه.. ناس يا بيه عملين جمعية وبيصوتوا على.. رد البيه بقرف واستعجال.. بيصوتوا ؟ على إيه..؟؟ ما يصوتوا وأنا مالي..لا يا بيه يا متعلم.. مالك ازاي ؟؟ دول بيصوتوا على أرواح خلق الله.. بس خلق الله دي قطط.. زي القطة اللي ماشية جنب الراجل الغلبان ده.. يضحك البيه وبتهكم ؛ قطط ههههه الله يخيبك.. انت أكيد بتهزر.. ههههه احكي لما اشوف.. ضحكتني...
لا والله دا حقيقي يا بيه الجماعة دول بيلعبوا الكورة بالقطط.. دي تموت.. دي تتسرب.. دي نقطع ودانها.. ودي نديها للكلب يحمي سنانه فيها.. يرد الراجل الغلبان بشهقة كبيرة: أعوذ بالله.. أهو الجماعة دول عملوا زي الأمريكان.. تمام... في سوريا وليبيا والعراق.. وفينا كمان.. لِيه ؟؟
دول خلق الله ولهم الحق في المكان زينا تمام.. والرسول عليه الصلاة والسلام كان بيحبهم.. والقطة ولدت في كمه كمان... يمشي البيه ماهو معندوش وقت يضيعه في الإنسانية .. الكلب بتاعه بياكل كڤيار وسيمون فيميه وپاتيه.. ويزعل الراجل بتاع صندوق الدنيا.. كان طمعان من البيه في خمسة جنيه.. لأنه يا ولداه جعان ومدقش الزاد من أيام.. بص له الراجل الغلبان وطلع من جيب جلبيته جينه: والله يا بني دا كل اللي عندي.. وآخر لقمة كانت في أيدي أكلتها للقط اللي ماشي جنبي.. أصله يا بني غلبان.. ميعرفش يشتكي.. وأهي لقمة تسد جوع الجعان.. والدنيا كلها تساعنا... ماهو ربنا زي ما خلقنا خلق القط والكلب والطير في السما.. علشان يختبر رحمة الإنسان..
يابني اللي محسش بالحيوان تطلب منه يحس بيك ازاي... ويمشي بأمان الراجل الغلبان والقط ماشي جنبه يتمسح فيه بحنان...
ويضرب كف بكف صاحب صندوق الدنيا... وينادي وهو مندهش بس من جوه قلبه حاسس إن الدنيا لِسَّه بخير علشان لِسَّه فيه ناس ري الراجل الغلبان.. قرب.. قرب.. تعالي شوف العجب.. الغلبان بيقسم قوته مع الحيوان.. وصاحب الجاه والمال مش عايز إزعاج.. فاكر إنه مطول فيها ومالكها.. دا هو الغلبان.. مش الرجل الغلبان.. ياإنسان.. قالوها زمان.. الدنيا سلف ودين حتى المشي على الرجلين.. وداين تدان.. قرب.. قرب.. تعالي وشوف صندوق الدنيا.. تعالي شوف العجب.. قرب.. قرب..