جماهير المارد الأحمر ترد على بيان مارتن يول..محمد: «المحن الهولندي مش هياكل معانا».. محمود: «استعطاف للجماهير».. أحمد: «هتشلنا».. صالح: «واخدين الدوري قبل ما تيجي».. الغمراوي: «الأهلي كبير على تفكيرك»

شبهت بعض جماهير النادي الأهلي البيان الرسمى الذي وجهه الهولندي مارتن يول، المدير الفني للنادي الأهلي، لجماهير القلعة الحمراء والذي اعتذر فيه عن إخفاقات الفريق الأخيرة بخطاب الرئيس الأسبق حسني مبارك الذي استعطف فيه الشعب، أثناء اندلاع ثورة 25 يناير 2011.
«توكل على الله»
قال محمد حمدى: «لا بقولك إيه يا نجم.. أسلوب المحن الهولندي ده مش بتاعنا مش هياكل معانا.. خد حاجتك وتوكل على الله كده عشان إحنا فاض بينا»، وأضاف محمود محمد: «مع الأسف كلام حضرتك كله كلمات استعطاف للجماهير مافيش أي مبدأ لكلامك بسبب الكلام ده خسرت الباقي اللي كان يريدك».
وعلق أحمد سعيد على رسالة مارتن يول قائلا: «كلام جميل وعارفين أننا في ظروف صعبة ومافيش هجوم عندنا.. لكن اختياراتك في الملعب هتشلنا والناس المعروفة اللى بتلعب كل ماتش سواء مستواهم حلو وحش بيلعبوا ده تبع الظروف الصعبة برده»، وأضاف محمد صالح: «الأهلي كان واخد الدوري من قبل ما تيجي، تشكيل الفريق بتبدأ بيه غلط كل مرة عند إصرار رهيب على أشرك صبري رحيل وعمرو جمال مع وجود على معلول وتألقة في مباراة إنبي وعدم جاهزيته حسام غالي عندك السولية وكريم نيدفيد وصالح جمعة أنت مدرب... ارحل».
«مش ناقصة أمراض»
وقال محمد يوسف: «أنت مدير فنى على مستوى عالٍ جدًا وإن شاء الله الأهلي هيبقى عالمى معاك وتحقق جميع البطولات إن شاء الله بس علشان خاطر النبي بلاش تلعب عمرو جمال تانى وركز مع متعب ومروان محسن»، فيما قال عبد العزيز الغمراوى: « مشكلتك أنك مدرب فاقد روح المغامرة ودايما عاوز تشتغل على خطط طويلة الأمد وده يا حبيبي مش مع الأهلي تشكيلك لمباراة زيسكو يثبت ضعفك وخوفك من المغامرة، أنت مدرب جيد لفريق متعود على المركز التاني إلى الخامس أما الأهلي كبير على تفكيرك».
وأضاف كوكى يوسف: «بنقولك إيه يا باشا الكلام ده إحنا كشعب مصرى شوفنا منه كتير ومابياكلش عيش معانا والدوري مش إنجاز مش كل شويه هتفكرنا الإنجاز بتاعك وأنت اعتمدت على ناس ورميت ناس في الزبالة ما بالك بقى لو قعدت كمان شوية انجز وامشى قبل بداية الموسم مش ناقصة أمراض».
يذكر أن مارتن يول المدير الفني للأهلي تقدم بطلب لمحمود طاهر رئيس النادي للرحيل عن الفريق بشكل رسمي، بعد المناوشات التي حدثت بينه وبين الجماهير عقب لقاء زيسكو أول أمس ومحاولة البعض التعدي عليه والاشتباك معه بالأيدي.