«إن كيدهن عظيم».. صفحة على «فيس بوك» ل«تجريس» الرجال الخونة.. 18 ألف سيدة يجتمعن ب«أنا أعرفه».. «الصورة» بوابتهن لفضح «اللعوب».. وناشطات: «الشيطان بيستغفر ربنا جنبنا».. و«هنجيب الخاين في شوال»

أكثر من 18 ألف أنثى اجتمعن في صفحة «I know him» على موقع التواصل الاجتماعي «فيس بوك»، فقط لأجل «تجريس» الرجال وكشف خيانتهم.
الصفحة التي لاقت رواجا كبيرا دشنتها مجموعة من النساء لكشف خيانة أزواجهن من خلال نشر صورته على «الصفحة»، وعليه تسرد كل من تتعرف عليه حكايتها معه.
مؤسسات «الصفحة» قلن: «لأن فكرتها تتلخص في أنك لو شاكة في خطيبك أو صديقك أو أي رجل في حياتك هنا هتعرفي تاريخ حياته، كل ما عليكِ هو نشر صورة ليه وأي بنت تعرفه هنا هتحكي لك عنه تعرف إيه بالظبط.. وربنا يقدرنا على فعل الخير».
تفاعل ناشطات موقع التواصل الاجتماعي مع الصفحة فقالت رشا رشدى: «الشيطان بيستغفر ربنا جنبنا»، فيما قالت منة الله مصطفى: «البنات اللي مش حابة تجيب لنفسها مشكلة أو حد يعرف إنها صاحبة اللي هتنزل صورته تبعتلي الصورة وأنا هنزلها هنا».
أما شروق عمارة فقالت: «أنا الموكوس اللي كنت بحبه كان بيكلم صاحبتي وبيضحكوا عليا، وصاحبه اللي جه فضحوا عشان كان بيحبني»، وقالت إسراء السيد: «هبعتلكو صورة واحد تجيبوهولي في شوال.. واللي هتجيبهولي في شوال الأول هسيبهولها عشان يكفر سيئاتها».
وأضافت نوران غازى، «يا جماعة أنا مبسوطة بالجروب بس خايفة الولاد يعملو نفس القصة وبنات مصر كلها تتفضح وتبقي كارثة»، أما منى إبراهيم فقالت: «يالا مبروك علينا الطلاق يا رجالة»، وهدير جمال: « برافو عليكو أقسم بالله إحنا أجدع من مليون محقق».
وقالت هدير محمد: «أنا مش مصدقة بجد أن كيدهن عظيم دي الشياطين هتقعد في البيت»، أما أسماء منير فقالت: «أنا كنت رايحة أنام بس فكرته في حد ذاته خلتنى أقول شكلها حتبقى party للركب».
وأضافت هند عبد الرحمن: «10 آلاف عضوه في نص ساعة إيه الجمال ده، دا المفروض يمسكونا الحكومة واحنا نمشي البلد زي الساعة»، أما رغداء الشاذلي فقالت: «غالبا الرجالة ماتت بعد ما سمعوا عن الجروب ده».