بالصور.. فتيات مصر يتحدن لكشف خيانة الرجال في «I Know him».. الشباب يحرجوهن ب«شهامتهم».. «نشطاء» يطالبون بالقبض على أدمن الجروب.. و«مغردون»: بتفضح نفسها مش الشباب

دشن رواد موقع التواصل الاجتماعي «تويتر» هاشتاج «I know him»، تزامنًا مع تدشين فتيات «الفيسبوك» جروب بهذا الاسم، والذي تخطى عدد المشتركين فيه إلى 55 ألف عضو في غضون ساعات قليلة، وتكمن فكرته في كشف خيانة أصدقائهن من الشباب أو أزواجهن، وتصدر الهاشتاج قائمة الأكثر تداولًا.
في الوتيرة ذاتها، قامت العديد من الفتيات على «فيسبوك» بتدشين جروب «i know him»، لكشف خيانة الرجال لهن، وفي غضون ساعات قليلة وصل عدد المشتركات بالجروب ل 50 ألف، وفي المقابل قام الشباب بتدشين جروب «i know her»، لمعرفة حقيقة خيانة الفتاة له من عدمها.
وتضاربت أساليب المنشورات بهذه الجروبات، حيث انتهج جروب الفتيات منشورات للسؤال عن الشباب للتعارف عليه، أو لكشف خيانته.
أما جروب الرجال، تتلخص فكرته في محاولة وقف هذه المهازل، ولم يقوموا بنشر صور للفتيات، الأمر الذي حاز على إعجاب العديد من الفتيات.
وتضاربت ردود الأفعال لنشطاء «فيسبوك»، حيث قال مصطفى جمال: «جروبات I know him وI know her أخطر من صفحات شاومينج، ده طعن عشوائي في العرض والشرف وقدام العالم كله، لو فيه دولة اقبضوا على أدمنز الجروبات ده أولى من شاومينج».
وأضاف مصطفى مجدي: «في بنات عملوا جروب اسمه I know him بينزلوا في صور الرجالة عشان أي راجل بتاع بنات أو خاين يتجاب تاريخه من أول ما أتولد ويعرفو ان الله حق ويتنفخ».
وقال أحمد عبدالوهاب: «عارفين يعني ايه اتعمل جروب i know him علشان أي ولد صورته تنزل ويتجاب تاريخه، دا معناه إن هيتعمل جروب اسمه i know her اللي بالفعل اتعمل وهيتجاب صورة أي بنت وهيتقال عليها كلام حتى لو مش صح، انتوا بتعملوا ايه بجد، لا حول ولا قوة إلا بالله».
وتابعت أماني صابر: «الله يخربيت i know him، على i know her، ايه الفراغ دا».
وقالت رحمة عبدالله: «جروب I Know him بيأكد أن هذه البقعة من العالم متستحقش يكون عندها فيس ولا نت أصلًا شعب غبي وزبالة».
ومن جانبهم، دشن رواد موقع التواصل الاجتماعي «تويتر» هاشتاج «i know him» الذي تصدر قائمة الأكثر تداولًا، حيث قال أحد المغردين: «#i_know_him طب ولما حد يموت بسبب تفاهة اهليكوا دي هتستريحوا يعني، عالم أغبية».
وتابع آخر: «اللي البنات بتعملوا دا إسمه هبل لأن هى مبتفضحش الولد على قد ما بتفضح نفسها #i_know_him».
وقالت مهيتاب: «#i_know_him #i_know_her شعب محتار يفضح نفسه ازاي اقسم بالله، وطالما انتوا مش واثقين في بعض بترتبطوا ليه، عشان تفضحوا بعض ربنا يهدي والله».