«تخاريف» للشاعر ولاء الدين فاروق

أنا أصعب من أسهل حاجة
أنا أسهل واحد يتشنكِل
أنا روح مُشتاقة ومحتاجة
لكن ف الدنيا أنا مكمِل
أنا كاره حزنى ومش هاوى
مُحترف الضحك
مش أراجوز مولد ولا حاوى
بلياتشو ف سيرك
أنا زهر الطاولة على القهوة
لو كان شيش يَك
أنا دعوة حفل زفاف عاجل
هيبطل عك
أنا قرص فياجرا ف يوم دُخله
علشان مَعرِفش
أنا كل هزار يبدأ بالإيد
وبيقلب قفش
أنا مج لاتيه / مضبوط ف كافيه
والفوم ع الوِش
أنا مَيه بتنزِل ساقعة عليه
ماهو قام مبسوط / وبياخد دُش
أنا صوت مضبوط / بفلوت أو عود
كدا من غير وَش
أنا فك الشفرة لأى قناة
وعايزها تشوفها معاه / عالدِش
أنا فرحة بتيجى ف عز الوقت
ومتتفوتش
أنا أطيب من أصيع صايع
ومليش ف الغش
وأنا أصيع من أطيب طيب
ومبتهددش
أنا اسم هتلقاه جوا الناس
بس أعمل سيرش
وأنا قبل الآخر بشويه
ف هقول معلش
لو حتى كلامى مفهمتوش
ف متستغربش
علشان لو جيت تسألنى ازاى
رتبته هقولَك
أنا معرفش