بالفيديو.. بطل صورة الثانوية العامة: «هدفنا تصحيح مسار التعليم»

أكد ناصر سيف، طالب الثانوية العامة صاحب الصورة الشهيرة التي ظهر فيها أثناء مطاردة أفراد الأمن له، أنهم بصدد اتخاذ العديد من الخطوات التصعيدية في حال عدم الاستجابة لمطالبهم.
أوضح: «لو مطالبنا ما اتنفذتش إحنا هنصعد وهندخل في اعتصام مفتوح أمام مجلس الوزراء تحت شعار: تصحيح مسار التعليم المصري».
أضاف «هدفنا إصلاح مسار التعليم المصري.. التعليم في مصر ما يسرش أي حد، لأن الحاجات اللي بندرسها ما بتتناسبش مع سوق العمل»، مشيرًا إلى أن «أهم مطالبنا إيقاف المهزلة اللي بتحصل.. خلاص إحنا اتظلمنا، ودي دفعة الظلم لأنها أكتر دفعة فيها ناس اتظلمت فعلًا».
أكد أن «التعليم هو اللي هيرفع من شأن البلد، وأن المسئولين لو اهتموا بشأن التعليم والصحة في مصر خلاص مش عايزين أي حاجة تاني، إحنا الطلبة اللي هنعرف نرتقي بالبلد، دخلونا الكليات اللي إحنا حابينها عن طريق تفعيل نظام القدرات عشان لما نتخرج نعرف ندي البلد».
وعن اعتبار ثبوت تسريب أسئلة بعض المواد، سند قانوني يتيح لوزارة التربية والتعليم إعادة الامتحانات، أوضح: «إحنا مش ذنبنا.. إحنا ما بنصدق نخلص امتحان لأنه بيبقي زي هم وانزاح من على صدورنا عشان نخلص من تعب 12 سنة تعليم مالهومش أي لزمة».
يذكر أن سيف ناصر، هو صاحب الصورة التي التقطها الزميل محمد متعب بالأمس، والتي تظهر مطاردة قوات الشرطة له أمام وزارة التربية والتعليم لمنعه من الاعتراض على الفوضى التي تشهدها امتحانات الثانوية العامة التي فشلت الدولة في السيطرة عليها بسبب التسريبات وإلغاء الامتحانات وآخرها امتحان مادة "الديناميكا".
وكانت صفحة «الشرطة المصرية»، وهي صفحة غير رسمية تتحدث باسم وزارة الداخلية، ادعت أن الصورة التي التقطها الزميل محمد متعب، للطالب ناصر سيف «مفبركة»، وهو ما نفاه «ناصر» بقوله: «وزارة الداخلية زي ما نزلت على الصفحة الرسمية بتاعتها إن الصورة دي فوتو شوب ممكن ننشرلها صورة واتنين وتلاتة وعشرة، تأكد إن الصورة دي مش فوتو شوب.. هي الفكرة إن الصورة دي عبرت عن حالة الطالب وبينت هو بيعاني من إيه».