«فلسفة الاستغناء» قصيدة لعبدالله إمام

اتعلم فلسفة الاستغناء
كل ما تملكه ملكك
كل ما امتلكك غباء
الوحدة لو عادة
صبح الاستغناء عبادة
قلبك ملكك
ابعد عن اللي سرقك
بسم الحب كله كدب
افهم فضيلة الاستغناء
و عيش ع الأرض
كسرت قلمي
قلبي استقام
كسرت قلبي
زاد الكلام !!
الحزن ليل راح ينتهي.!
و في جيب قميصك ينطوي
شمر كمام الصبح
الجرح وجعه بينكوي
يوقف نزيف القبح
يوقف نزيف ماضي
سايب اسر ف القلب
بكره بيجي يدب
و ينسي حزن امبارح
و ينسي مين كان جارح
لكني مش نساي
بعمل سعات ناسي
لاني مش بكاي
اعزم قوي ع الشريد
و اليتيم والطريد
ببياته جوه القلب
و طنه بينفي الحب
فانت اعترف يوم بيه
جوه الوريد خبيه
بره المكان طوف بيه
يا هل تره ساكن
و لا الزمان دار بيه.!
اعذرني لما انسي
و لما اقسي
واطير بريش الطاوس
و اقتل عصفور بقوس
و اجرح اوي اللي غايب
و القرايب ب الضرايب
عن كل ما استثمره الزمن فيا
لو كنت تسليا
الوش المزيف بان
إنسان بروح إنسان
لا ملاك ولا شيطان
اللي سبق كسب السبق
و الجايزه كت حبه ورق
بيحركه العالم
دواير دواير
يناير يناير
كل اللي لينا اتسرق
كل التضاد مكشوف
كل التناقض شوف
حتى القمر مكسوف
عن أنه يتحول
الليل عليه طول
والخلق شكايه
لكنه متحمل
بين كل حكايه وحكايه
انا يا قمر مش منهم
انا يا قمر مش بينهم
انا يا قمر زيك
مش بحكي اسراهم
من بين طوفان المعرفه
اجهل انا عنوانك
أهم تفاصيل الحياه متفلسفه
مع انها عنفوانك
يا هل تري انتي اللي موصوفه
و معروفه بين كل اشعاري
ازاي في تكوينك اسراري
ازاي في تأخيرك مزاري
انا كنت مش داري
دلوقتي مش ناوي
لا اتجرح ولا اداوي
معزول ما بين صندوق الذكريات
من كام سنه فاتوا
لكام سنه قدام
مع كام ذكره ماتوا
من كام قرار إعدام
متراس ورا متراس
و نجوم الليل حراس
على السما
مش متزينا بيهم عشانك
مش هنا برضوا مكانك
بره صف الانتظار
الزمان ده مش زمانك
امضي يا ضمير يلا انصراف
المكان خالي م اللطاف
امشي يلا وسيب شيطاني
بين دورب الانحراف
بره مخطوط المعاني
الدين فلوس ونفوس
متعتقه سواد مدسوس
ادفع قوام واهرب من لعنه الداين
مداين مداين
راح تنتحر فيهم
من كتر تكتيفوا
لا بيعترف بالخير ولا لينا خير فيهم
اخلع طراطيفه
من بين رقبتك
واكسر دراع زيفه
الدنيا مش املا
بالمرتجل املا
الدنيا مش صعبه
الدنيا دي لعبه
و الفوره مفتوحه
و الرقبه ملوحه
اعدلها..
الضوء على المشاهير
الطبل والمزامير
اختار تكون غيرهم
افهم ف تفسيرهم
وامشي عكس السير
الدنيا للتغير
مش ثابته ولا تفصيل
المجد للتفاصيل
لما تكشف الكداب
و تقرب الاحباب
الدنيا ليك. للغير
و انت هنا وحدك
هما عايشين معاك
بيكملوا في غناك
بيعطلوه حلمك
بيبعده ف خطاك
وبيكفره بهمك
يقوله ليك مواويل
و سيبه طار دمك
اقبلها بشروطك
واوعاك تخون
انا مين اكون
من غير هدف وجنون
انا مين اكون
من غير بكا وظنون
انا مين اكون
من غير م انت تكون
لسه الوجع مقبول
لسه الكلام مقتول
انا قولت فانت تقول
و البادي كان اظلم..
اللي انجرح مظلوم
في العشق مين يظلم..!
اللي انجرح صدق
أن الغرام اصدق
و المركبه تغرق
لما الشراع دفته تسبق
عكس الرياح فا تذول
الكلمه كانت وعد
و المستحيل كان بعد
و القلب لما حب
كان الغرام مسئول
بيجرب ويقرب
بيلف وبيدور
فا الحضن كان اقرب
لما العيون تبكي
و البوسه دي بتشفي
لما الوجع يضوي
اني خيرتها فا احتارت
دارت في الدنيا وم ختارت
فاختارتك انت
من بين بنات مملكتي
انت الكون فا اكون
كما كنتي..
ياللي بقيتي غياب
و غربه وعتاب
و سهر وسراب
و باب يرد ف باب
و كلام ف جواب
راجع من نص السكه
و حروفي صبحت فكه
بقشيش لبتاع القهوه
انت اللي انا بهوه
وهواكي رياحه مسافره
في تراب ومطره وعفره
و انا من غيرك شفره
ملهاش ولا أي جواب...
أمرت اكتب
و انا مش بحترف الكلام
و لا شغلتي ولا دنيتي
اكتب
الشعر مش مكتب
و ورق وحبر أزرق.
الشعر ده مذهب
و بيتخذ شرعه
لما الوجع يصدق
لما الهوى يصدق
الشعر كان مذهب
الشعر بقي كار
الشعر ف انحدار
دلوقتي مهنه تتبع
ارخص كتير م المتبع
رص البيوت خراسان
عامل يعيش خرسان
يموت خرسان
و احنا نرص بيوت
هو يبات في تابوت
و احنا نرص بيوت
هو ف حياه مكبوت
و احنا نرص بيوت
هو يموت تعبان
واحنا بيوت خراسان
إنسان قتل إنسان
اتقسمه للخير والشر
اختار انت بينهم
الثوره كر وفر
و مسافه تفصلهم
فاختار انت بينهم...
بسم الذي خلق السما والأرض
و الإنسان بلون قلبه وجهد الفرض
مافيش بينا فروق ولا تحت وفوق
بسم الذي جعل الهوا والماء
لكل فرد
الأبيض والاسمر والشعبي والممزوج
يا بن أدم يا عنصري يا مفتري
مين يمتلك فينا الدواء من دائه
مين قلبه يوم غلب السهر أو سابه
انا دورت بين مفارق الحواري
و الزمالك والقصور والقهاوي
وشوفت من كل قلب بلاوي
الحسبه يعني في الشقا أو في اللقا
اكاد من من فرط البكا يغيب البصر
يا ليته يختفي وتبقي البصيره
انا قلبي نزف من الحزن ودجر
من سوق فاتارين عرض البشر
احنا في خطر
طول ما حنا فران تجارب للمختبر
و حصان سبق لجل الورق الأخضر
احنا في خطر
طول ماحنا
كلاب حرس لجل ما يحكم العسكر
احنا في خطر
و السور بيعلي كل يوم اخبر
يا بن ادم الكرة ليه يسكن
والرحله معروفه للطين تعود وتضم
كل البشر من دم
كل البشر ف الهم
كل البشر عنوان
واسم المكان إنسان