إحنا بتوع الحضارة..!!

بينما وأنا أستعد للخروج من المنزل متوجهاً إلى العمل.. استوقفني المفعوص أبو نص لسان، بدون مقدمات.. ولا إحم ولا دستور قديم أو جديد.. وسألنى.. مين الأقوى.. إحنا "العرب" ولّا إثرائيل؟
- إحنا طبعا..!
- بأمارة إيه؟
- بأمارة كل حاجة.. إحنا 22 دولة، وهيا يا دوب زى محافظة صغيرة.. وكمان عندنا المال.. والبترول.. والآثار.. وعندنا الأزهر.. وبيت الله الحرام.. والكنيسة الأم و...
- متكملشى يا بابا.. ثحيح إحنا عندنا كل ده، لكن ناقثنا أهم حاجة تخلينا الأقوى على مثتوى العالم كله، زى ما كنا زمان.. وده إللى مخلى إثرائيل أقوى من كل الدول العربية..
- تقصد عشان عندها أسلحة نووية؟
- ثحيح "النووى" مطلوب.. لكن مش هو أهم حاجة..!
- أومال إيه يا فالح.. ويا ريت بسرعة.. أنا مش ناقص دوشة دماغ..!
- الدماااااغ..!! هو ده اللى عند إثرايل ومش عند العرب..!!
- انت بتخرّف تقول إيه.. أومال إيه اللى انت شايله على كتفك.. دماغ ده ولّا مش دماغ؟!
- طبعا دماغ.. لكن عارف الثبب الأثاثى اللى مخلينا أضعف من الثهاينة؟
- منكم نستفيد يا مأروط اللسان..
- العرب بقاللهم فترة كبيرة رفعين شعار "العقل زينة".. وعشان كده علّقوه على الحيطة، و"ركنوه" أكتر ما بيركنوا عربياتهم فى الجراج.. وبقوا يخافوا يثتعملوه عشان ثلاحيته انتهت.. واعتبروا التفكير رجث من عمل الشيطان.. أو حاجة أبيحة.. مع إنه أكتر حاجة ربنا أنعم علينا بيها..
- ومين بقى اللى قاللك إن العرب مبيفكروش؟!
- مش محتاج حد يقوللى.. بُثْ حواليك وأنت تعرف.. إثرائيل شغلت عقلها وبقى عندها طفرة علمية.. وإحنا "حطينا" عقلنا في الفريزر وبقى عندنا "خيبة قوية".. ابتعدنا عن الدين الحقيقى بتاعنا.. وبقينا بنجرى ورا الخرافات.. وشغلنا نفثنا ب"بول الإبل" وبول الحمير.. و"نكاح الموتى" ونكاح "المُززْ" اللى لثه بتروح المدرثة بالمريلة.. وتفتح التليفزيون تلاقى أكتر الإعلانات اللى بتلغى النُثْ الفوقانى.. وبتركز ع النُثْ التحتانى.. إشى حبوب.. وإشى حقن.. وإشى دهان يخليك مع مراتك زى الأثد أو الحمار أو الحثان.. وآهى كلها فى الآخر حيوانات..!!
- انت باين عليك مبتقراش التاريخ.. إحنا بتوع حضارة سبعتلاف سنة.. و..
- ما بلاش النغمة دى يا بابا.. حضارة وماضى عريق.. وكلام لا يودى ولا يجيب.. إحنا في دلوقتى.. عملنا إيه عشان نقدر نثحق إثرائيل وما وراء إثرائيل؟!
- أنا اتأخرت على الشغل.. ولازم أمشى..!!