«مرشح حر» قصيدة لمحمد حميدة

ابن الدايره
ابن الدايرة مرشح حر
علق يفطه في كل ممر
لزق صوره
وقال شعاراته
هيعوضكوا العيشة المر
ابن الدايره مرشح حر
ابن الدايره ده وطني بجد
مخلص جدا لابعد حد
كان من قادة الحزب الوطني
بس ده عمره ما يخذل حد
طالع واكل نازل واكل
كله بتمنه لزوم الود
مش بمزاجه يا ناس مضطر
ابن الدايره مرشح حر
ابن الدايره مرشح لقطة
عارف كل مطالب الحتة
رايح جاي عشانكم طبعا
أوعوا تقولوا كلامه أونطا
كل برامجه أكيد في السر
إبن الدايره مرشح حر
ابن الدايره مرشح ماسي
دايما بيقول أهلي وناسي
أنا هترشح بس عشانكم
مش طمعان أبدا في كرأسي
ابن الدايره مرشح حزبي
بيقول إنه مناضل حربي
لامم كل أعيان الدايره
بيقول أهلي وناسي قرايبي
إبن الدايره مرشح حزبي
إبن الدايره يا ناس ده فلول
قيمة وسيما وعرض وطول
بكره ف عهده اللحمة هتكتر
هينسيكوا دماغ الفول
ابن الدايره ده كان إخوان
بس بجد أكيد إنسان
بدل السكر قال والزيت
بيوزع ع الناس خرفان
ابن الدايره مرشح نور
بيقول لينا أكيد دستور
أصبروا لما أكيد نتمكن
شرعيتنا لابد تثور
ابن الدايرة مرشح نور.