البااارلمنجي ل«هديل مصطفى»: إنتي بتلعبي بالنار يا مُزة

أهالي دائرة "مصر الجديدة" الأعزاء.. طبعا إنتم عارفين أنا قد إيه بحبكم.. وقد إيه أنا حريص على مصالحكم.. وتعلمون أمنياتى الشديدة بأن أحقق رغبتكم في وصولى للبرلمان.. إلا أن من ينافسوننى على مقعد البرلمان هم من يثيرون العجب والصيام في رجب.
يعنى مثلا حد منكم يقولى إيه معنى إن بنوته بتكتب سيناريوهات وقصص وحواديت تعلن ترشحها أمامى في تلك الدائرة؟!
طبعا حد منكم هيسألنى: "يعنى إنت سايب رجال الأعمال الفطاحل والحيتان المرشحون في الدائرة وجاى تكلمنا عن بنت غلبانة لها طموح مشروع؟!"
وأنا بقى هرد عليه وأقول له: "لا يا سيدى حضرتك مش فاهم حاجة.. فترشح رجال الأعمال والحيتان أمامى لا يمثل لى أي مشكلة.. ليه بقى؟!.. لأنكم تعلمون تاريخهم وتعلمون تاريخى وتاريخ عائلتى البرلمانى أبا عن جد.. أما مثل هذه الفتاة التي تدعى "هديل مصطفى" فهى قد تدغدغ مشاعركم لعدة أسباب.. أولا البنت مُزة جامدة طحن.. ثانيا متعلمة وبتعرف تتكلم لغات وتقدر تاكل عقل الرجالة والستات في مؤتمر واحد.
والغريب أنها تعلن تحديها لى شخصيا في أكثر من مناسبة.. قال إيه هتوصل للبرلمان من الجولة الأولى.. طب حد يدينى عقله بقى ويقول لى إيه اللى ممكن تستفيده مصر عندما يمثل شعبها في البرلمان شوية ممثلين ومخرجين وكتاب سيناريو؟!
حد يقولى يرضى مين إنى أنافس خالد يوسف وهديل مصطفى وأمثالهم.. ومنذ متى كانت السياسة يديرها فنانين يا ست هديل!
على فكرة يا هديل أحب أقولك إنك بتلعبى بالنار.. فليس مثلى من تعلنين تحديه خاصة هنا في دائرة مصر الجديدة.. فأنا فقط أريد أن تتذكرى أننى حاصل على رمز "الغربال".. وما حصلت على هذا الرمز من فراغ.. إلا لأننى الوحيد القادر على غربلة المرشحين المنافسين في كل دوائر مصر.. أما رمز "الشاكوش" الذي حصلتى عليه فهو لا يمثل لى أي تهديد.. بالإضافة إلى أنه لا يليق بمزة حلوة طحن زيك كدا.
طب تقدرى تقوليلى هتعملى إيه بالشاكوش بتاعك ده وإنتى ذات الأيدى الناعمة؟!
طب أنا هجيبلك من الآخر.. لن تصلى للبرلمان طالما البااارلمنجى في الميدان.. اللهم إلا إذا قدمتى فروض الطاعة.. يعنى أنا ممكن أتركك في حالك حتى تصلى للإعادة.. وساعتها تضعى يدك في يدى مثلما فعل "بخيت وعديلة" في الفيلم الشهير.. وأهو برضو البرلمان لازم يبقى فيه حاجات حلوة تهدئ من سخونة الجلسات.
فإذا لم تقبلي تقديم فروض الطاعة فأقول لكِ "الفارس ينزل في الميدان".. أما إذا قبلتِ فسأقول لكِ مبروك وأنا بموووووووت في البرلمان!
مع تحياتى.. أخوكم "نزيه صندوق عبد المتعال الناخب" الشهير بالبااارلمنجى مرشح برلمان 2015 رقم صفر.. رمز الغربال!