شباب "فيس بوك" يكشفون سر انقطاع التيار: مصر تطبق التصويت الرومانسى على ضوء الشموع

على ضوء الشموع قام المستفتون بمحافظات الإسماعيلية، المنوفية وكفر الشيخ بالتصويت، الصدفة التى ظن البعض أنها بسبب تسهيل عمليات تزوير النتيجة كشف الشباب أنها تجرية جديدة تطبقها مصر لأول مرة، وهى التصويت على ضوء الشموع، وهى دعوة رومانسية وفقا لتوجيهات الرئيس مرسى الذى قال مرارا وتكرارا فى خطاباته: إن على المصريين أن "يحتضنوا" بعض، "فيتو كافيه" رصدت تعليقات الشباب:
أدهم رمضان: اللي هيقوللي الحكومة قطعت الكهرباء علشان التزوير هقوله لا يا ناصح.. لا يا أبو العريف، أبسلوتلي، ده اسمه تصويت رومانسى طبقًا لتوجيهات السيد الرئيس، وكله بالحب يا ساحبى، وسمعونى أغنية والله ما لينا غيره.
محمد عبد الفتاح: عندما قال مرسى فى خطابه الأخير إننا لازم نحضن بعض ونحب بعض، فكان يقصد أن مصر لازم تكون دولة رومانسية، والفكرة دى اتطبقت فى الاستفتاء، وخلانا نصوت على ضوء الشموع علشان يضمن الجو الرومانسى.
كريم صفوت: لما الكهربا تقطع عن المنوفية وكفر الشيخ والإسماعيلية، وهى محافظات معارضة، يبقى نستبعد عامل الصدفة.. ونقول علطووول: طفي النور يا بهية.. ده تزوير مية المية.
الصواف أحمد: نسبة "نعم" فى المرحلة الثانية هتطلع 104 % بالحافز الرياضى والمستوى الرفيع.
ماجد نبيل: عظيمة يا مصر يا أرض ال "نعم"، يا مهد الحضارة الشعب خلاص اتفرم.
منة مجدى: 98% ، 99.5 % ، 100 %، ده استفتاء أوائل الثانوية العامة مش استفتاء على الدستور.
حسام إسماعيل: سؤال واحد بس: هو فى حاجة اسمها 100% بعد الثورة؟!
رامى فرح: كلمة لن يعلم معناها سوى الثوار وإخواتنا "الهنود"، عموما هى معناها بالعربية ((ثورة)).
محمد المسلمى: الوضع فى مصر بعد الثورة إنه فى ناس دخلت مطعم سمك، فطلبوا كباب وكفتة، فجالهم صينية مسقعة، والخناقة دلوقتى إزاااى رز بلبن ومن غير زبيب.
دينا حسن: يعنى اللجان اللى طلعت 100 % نعم فى مطروح، عايزة أقولهم: يعنى مفيش واحد مسيحى، وممفيش واحد ليبرالى، ولا حتى فى واحد أحول علم على "لا" بالغلط؟!
إبراهيم الجارحى: وبكدة نقدر نقول: إن المرحلة الانتقالية انتهت بسلام... انتقل الإخوان إلى مقاعد السلطة، وانتقل الثوار إلى مقاعد المتفرجين، وانتقلت الثورة إلى رحمة الله.