محمود العدوي يكتب «اغتيال» رفضًا لبحر الدم

اغتيال
ناس بتصرخ انفجار
وناس بتجري ورا النهار
وناس في حالة انبهار
ودم سارح بين عيون شافت وعرفت بكرة ايه لينا يجيب
الوطن فاتح ورامح للمغيب
والشوارع مستعدة للنحيب
والنواح مالهوش معاني في القاموس
إلا معنى لشيء كئيب
اطوي صفحة كان فيه ثورة
وافتح الصفحة اللي بعديها بإيديك
كل يوم خوفك يزيدك
كل يوم هيقولوا سيدك
لأجل عينك
قام وحبسك
لأجل يتطمن عليك
البداية فيها دم
واللي جاي آخره بدم
واللي مات بالدم
كان في الأصل
بيتاجر بدم
غم غم غم غم
النواح في الشعر مش حكمة وصنعة
والفرح في الأصل كان كفر وبدعة
والوطن مالهوش في حوش المدرسة إلا علم
والثورة في الشارع معاتبة
والشهيد قبر ووردة وجرافيتي اترسم
يبقى ايه هيفيد يا عم
اللي جاي في السكة دم
كل دم يجيب في دم
واللي قاتل
واللي حابس
واللي طالع في البرامج
كلهم تاجروا بدم
واحنا بين السجن وبين حفرة جهنم
محبوسين
لا احنا كنا بنمسح النياشين
من فوق صدر النظام
ولا في مرة تاجرنا باسم دين
احنا اللي في عيون الغلابة اتصلبنا
واتغلبنا
واتسجننا في زمان المجرمين
احنا ضحكة الهزيمة
واحنا ناس يمكن قديمة
بس رغم سنين عذابنا
كنا فوق هوس الجريمة
كنا رغم العنف والضرب اللي علم فوق كتافنا
كنا رغم القهر والنقص في صفوفنا
نرسم الأحلام كلام
نبتسم لما تزيد العتمة
ويخطفنا الضلام
كنا أجمل من رصاصة
كنا ضجة بغير زحام
كنا بالمغنى وصوت الفرح بنعادي النظام
كنا دين ما فيهوش جهاد
إلا ضد الرأسمالي
اللي كان رمز الحرام
كنا دين ما فيهوش حرابة
كنا دين فيه الأنبيا هما الصحابة
والناموس بينا محبتنا الأكيدة
والصلاة ضحكة وماسكة ايد سعيدة
يبقى لون الدم عمره ما كان قميصنا
أو رئيس الظلم كان في يوم رئيسنا
إحنا غير كل المعادلة
البروليتاريا اللي ناوية
تبقى رغم الظلم عادلة