ابين زين

لسه الرغيف زى ما هو.. والعباد طوابير.. ولحد إمتى حنفضل فى الطابور يا وزير.. حتى الدقيق قمحه فيه عله وشكله خطير.. ما تقول لنا إيه الحكاية هو فيه مناشير.. وكل حبة بنشكى ونطلب التغيير.. بس الرغيف زى ما هو.. وشكله سر فى بير.. والناس غلابة ومش لاقية بدون تفسير.. عايزين نحس إن فيه تموين وله تأثير .. والثورة قامت عشان اللقمة والجماهير.. وكل مسئول يرجع حق كل فقير.. واللقمة هى الأساس وغموسها برضه مثير.. متفهمونى الحكاية عقلى تاه حيطير.. وزير بيمشى وبيجى بعد منه وزير.. وتصريحات بس تنفيذها علينا عسير.. والناس طوابير وألف مظاهرة فى التحرير.. والرمل شايف حاجات دى الودع أساطير.. الثورة ثورة رغيف وغموس بدون تبذير.. مش محتاجين الغلابة جاتوه وكيك وفطير.. فبلاش بقى تصريحات الأمر جد خطير .. وأنا قلت والرمل قال وكلامى فيه تحذير.. وخاللى بالكم وزير تموينا عنده كتير.. ونفسنا نشوف بقى إيه آخرة التحذير.. وف مرة تانية حاشوف البخت والمحاذير.. وحأقول لكم ربنا يستر بدون تبرير.