مرسى يدعو لأخونة الجراد!

نهار داخلى:
المكان: قصر الرئاسة مكتب الرئيس
الزمان :العاشرة صباحا
الرئيس مرسى يطلب من مكتبه استدعاء وزير الزراعة على وجه السرعة
لحظات ويصل وزير الزراعة إلى القصر وبعد دقائق من وصوله دخل إلى مكتب الرئيس
مرسى: إيه حكاية الجراد
الوزير: فخامتك جارى مطاردتهم خارج البلاد قريبًا تسمع خير
مرسى: خير إيه وشر إيه أنت بتشتغلنى الجراد مالى البلد والله حاسس إن المعارضة عاملة معاهم اتفاق
الوزير: يافندم ماتزعلش نفسك الجراد مهزوم مهزوم
مرسى: ياعم أنت لسه فاكرنى زى زمان لا فوق أنا تغيرت ومستعد" اقلع ملط والنعمة" .. فاهم؟
الوزير: فاهم يا فندم حاضر ادينى "تلاتة "أيام وتسمع اللى يبسطك
مرسى: بقولك ايه .. شكلك كدة بتهيس .. الجراد فى مصر له شهر وكان على الحدود ومقدرتش عليه والنهاردة بعد ما دخل جاى تقولى 3 أيام .. ياعم انسى
الوزير: تعلميات فخامتك
مرسى :شوف أنتم قفشتم كام مليون جراد
الوزير :مفتخرا كتير حوالى مليار جراد
مرسى :حلو ..اسمع منى يامعلم .. تعرضوا على الجراد الدخول فى الإخوان .. يعنى ليهم حق الحماية الإخوانية زيهم زى أى إخوانى فى العالم
الوزير: مبتسمًا إيه العظمة دى ده أنت دماغك تساوى تقلها الماظ
مرسى : تقلها بس لا أنا أخد الفرصة وتشوف منى ..ده أنا أعجبك قوى
الوزير: وأضح أن فخامتك فاهم ثقافة الجراد
مرسى: ايه ياوزير أنت .. أنا فلاح ابن فلاح هو انا جاى من المريخ لا ..هخلع
الوزير: وبعد أخونتهم فخامتك
مرسى :تطلقوا الجراد الإخوانى على الآخرين وبكده يتفرق دمهم على الحدود واللى يرجع حى من الجراد الإخوانى يحصل على الجنسية المصرية ويأخد 5 أفدنة فى الصحراء الغربية المهم نخلص من الموضوع ده
الوزير :فخامتك فى حالة رفضهم ومش بعيد يكون بينهم جراد لبيرالى أو كارهين للإخوان
مرسى منفعل : جرى ايه يااخى عذبوهم وهاتو فتوى أن قتلهم حلال
الوزير :حاضر فخامتك انا رايح ليهم دلوقتى واجيب الرد فورا
وينصرف معالى الوزير إلى خارج مكتب الرئيس لكن مرسى يصرخ تعالى بسرعه ثم يهمس للوزير : فى حالة نجاح الموضوع تقول للعالم كله دى حكمة فخامه الرئيس وإذا فشلت أنت صاحب الفكرة قدام الإخوان ماشى؟
الوزير :ماشى إن شاء الله هاننجح
مرسى: يرفع يده معطيا التحيه العسكرية ربنا معاكم
ينصرف الوزير ومرسى يمشى ويرجع يارب ينجحوا نفسى افتخر بحاجة يارب الشعب يقول إن مرسى عمل إنجاز غير المشاكل والمظاهرات والأخونة يارب وفق رجالنا البواسل فى أخونة الجراد ساعتها الواحد يبعتهم على المعارضة فورا وأى حد يقرب من القصر اسلط عليه الجراد
-الوزير يدخل مكشرا مهزوم مهزوم
مرسى: خير يافالح حتى الجراد فشلت معاه يبقى من حق المعارضة تقول عليكم فشلة أنتم حكومة فاشلة
الوزير :لا يا فندم هما ليهم مطالب
مرسى :خير حتى الجراد ليه مطالب إيه عايزين كادر ولاحصانة اطربنى
الوزير بعد تفكير وتهتهة: عايزين ضامن عشان فخامتك بترجع فى كلامك كل شوية ورأيك مش من دماغك.. ده كلامهم
مرسى منفعلًا مع تغير ملامح وجهه: ومين اللى قال ليهم إن شاء الله
الوزير: مش عارف فخامتك اسمع الأول مطالبهم وبعدين احكم
مرسى: اتفضل قول عجايب الجراد
الوزير يخرج ورقة ويقرأ بصوت عالى : إنه من جراد مصر إلى رئيس مصر لاتفرض علينا الإخوانية ولاتطلب منا جزية ونحن نحمى حدود مصر من أى جراد معتد على مصر ولاتطلب دعما من إسرائيل لطردنا من البلاد لنا مالكم من حقوق وعلينا ما عليكم من واجبات الشرط الوحيد أن يضمن هذا الاتفاق القوات المسلحة
مرسى يصرخ : لابقى حتى الجراد .. احرقوهم جميعًا وإسرائيل هتدمر اللى على الحدود !!