شلاليت

بقلم: فريد طه
بنزين وسولار ضايعين
راحوا فين ما إحناش عارفين
سواقينا في كل حتة
علي كل طريق واقفين
إيه الحكاية فهموني
بدِّي أعرف ريحوني
الحكومة تقول بنصرف
والتنابلة بيسرقوني
الحايه فيها مؤامرة
لأجل تبقي حياتنا جمرة
فين بقي السلطة ونفوذها
نفسي تبقي عينها حمرة
البلد قام فيها ثورة
،واللي حاصل يبقي عورة
كل حبة نلاقي حبة
يرقصوا لنا في كل دورة
فيه حكومة وفيه رئيس
فيه يا خلق الله بوليس
فهموني نفسي أعرف
واللا يعني أموت فطيس
الوقود بنزين سولار
محتاجينه في كل دار
صدقوني إن ظل ناقص
كل حاجة حتبقي نار