- عايز تثبت يامحترم انك فعلا بتحب مصر ؟! هكذا فاجأني الرجل وانا واقف في صالة الوصول بمطار القاهرة انتظر حقائبي بعد تلك الرحلة البعيدة فقلت بدون تردد : طبعا هوه احنا لينا بركة الا مصر..ياحبيبتي يا مصر يامصر! - خلاص يبقى لازم تتبرع للخواجا ساميرس عشان يسدد ضرايبه!! - ساميرس مين؟! - ياراجل فيه حد ف مصر مايعرفش الخواجا ساميرس؟! - ايوه خلاص عرفته ...وهل يخفى القمر! - اوعا تقولى انك كمان ماقريتش مقالة اخونا الجلاب اللي دعا فيها المصريين للتبرع للخواجا؟ - الجلاب مين؟! - لااااااااا...ادا انت عندك زهايمر جامد!! - خلاص يا عم افتكرته .. أيوه دا رئيس تحرير الجورنال الملاكي بتاع الخواجا؟! - ماانت عارف كل حاجة اهو ..امال بتستعبط ليه؟!! - معلهش تعب السفر في السن الكبيرة بعيد عنك ...مالها بقى مقالة الجلاب ؟! - المقالة دي يا عم الحاج ترنيمة في حب مصر ..عشان كده يمكن يعملوها غنوة أو فيلم أو نشيد وطني للتلامذة!!! - للدرجة دي؟! - وأكتر ..دول رشحوها لجايزة نوبل باعتبارها المقالة اللي مفيش زيها ف حب مصر! - وهوه حب مصر محتاج مقالات ؟؟ - طبعا يا عمنا ..ما هو اللي يحب مصر اليومين دول لازم يرقص ويهتف ويغني ويكتب مقالات وكمان يتبرع!! - يتبرع لمين؟؟! - يتبرع للمليارديرات حبايب مصر! - بس التبرعات زمان كانت بتروح للغلابة وضحايا الزلازل والسيول والعبارات "الغرقانة"! - ده كان زمان وجبر..النهاردة لازم تتبرع للمليارديرات اللي ظروفهم تعبانة!! - وماله يا اخي نتبرع ..مادام ح نساعد ملياردير مزنوق وف ورطة!! - ورطة سودا بعيد عنك ..ولازم كلنا نساعد زي ما قال اخونا الجلاب .. وكله يهون في حبك يا بلادي - طيب وحياة ولادك فهمني الحدوتة ..عشان اتبرع وانا ضميري مستريح ! - الخواجا ساميرس يا محترم واقع ف أزمة ...عشان الجزاير طالبة منه نص مليار دولار ضرايب!! - نص مليار حتة واحدة ..طيب والخواجا ماله ومال الجزاير؟؟؟ - الراجل كتر الف خيره عامل مشروع كبير هناك ... وقال ايه؟.. بدل ما يشكروه ويبوس ايديه ورجليه ..عايزين ياخدوا ع المشروع ضرايب!! - شوف الافترا يا اخي ....دول فعلا ناس مفترين !!!! - همه بيقولوا الخواجا كسبان عشرين مليار دولار ولازم يدفع الضرايب اللي عليه...وهوه بيقول انهم حاقدين عليه عشان هوه مصري وبيحب مصر! - واضح طبعا انه غلبان ومظلوم ومسكين وضحية !! - عشان كده اخونا الجلاب بيقولك لو بتحب مصر بصحيح ..اتبرع للخواجا زي الست اللى اتبرعت له بتلات ارباع مليون جنيه! - تلات ارباع مليون حتة واحدة ..دي اكيد واحدة من قرايبه او حبايبه؟! - ابدا وحياتك دي مصرية عادية مالهاش اي علاقة بالراجل ....بس هي زعلت من موضوع الضرايب ..واتأثرت جامد وكان ح يجيلها جلطة ..لكن الحمد لله لحقت نفسها في اخر لحظة واتبرعت ب"تحويشة العمر"!! - أمال بعد كده هي ح تعيش ازاي !؟ - وانت مال اهلك يا اخينا ..اكيد ح تلاقي اللي يتبرع لها زي ما اتبرعت للراجل !!! وهنا انهمرت الدموع من عيون كل الواقفين في صالة الوصول بمطار القاهرة، وولولت النسوة وهن يرفعن علم مصر ويهتفن بحياة الخواجا، اما انا فقد انتابتني حماسة غريبة وقلت : - طيب انا كل اللى حيلتي خمسميت جنيه ح اروح اتبرع بيهم ..وربنا يتولاني انا والعيال! - اهو كده الشهامة والجدعنة والوطنية والمفهومية...وصدقني أكيد الجلاب ح يكتب عن الخمسميت جنية بتوعك! - ياعم سيبك م الكلام الفارغ دا ..وقل لي اتبرع فين !؟ - شوف يا محترم ... انت عارف البرج الكبير العالي اللى على النيل دا..اللي طوله ييجي كده تُلتميت دور ..هو دا مقر الخواجا ساميرس.. انت تروح هناك ومعاك الخمسميت جنيه ومقالة الجلاب! - طيب والمقالة لازمتها ايه ؟! -عشان يختمولك علي قفاها بختم الخواجا ..انك فعلا بتحب مصر!!