بالفيديو.. أصحاب المخابز ل"المسئولين": "صلحوا ماكينات الكروت الذكية"

أكد صاحب أحد المخابز المتجمهرين أمام محافظة الجيزة، أن مشكلتهم تتمثل في تكرار تعطل السيستم الخاص بماكينات الكروت الذكية.
وقال: "أصحاب المخابز اتبهدلوا بعد تطبيق نظام الكروت الذكية، لأنها بتعطل كل شوية"، مشيرا إلى تعطل الماكينات منذ 15 يوما ولم يتدخل أحد من المسئولين لحل الأزمة.
وتابع: "كان الرغيف بثلاثين قرشا وأصبح بربع جنيه، ولغوا الدعم وقبلنا كل الإجراءات دى ولسه شغالين علشان نشتغل في مالنا ومانشتغلش عند حد، كنا بنقول نقف جنب الدولة لكن المنظر اللى فيه أصحاب المخابز لا يرضى البشر".
وقال آخر: "أنا بفتح من الفجر وادفع فلوس الدقيق والعمال، آجى أشغل ماكينة الصرف متشتغلش العيش مايتصرفش ويبوظ والناس تتخانق معانا ويقولوا إننا سبب كل المشاكل دى وبنسرقهم".
وأوضح صاحب مخبز ثالث أنهم يمتهنون العمل في المخابز عن أجدادهم، وقال: "أقل عامل فينا يمتلك مؤهلا متوسطا، ومفيش بينا حد بلطجي ومبنعملش مظاهرة.. إحنا عايزين المكن بتاعنا يشتغل بس".
يذكر أن عددا من أصحاب المخابز من بولاق، والعمرانية، والهرم، والحوامدية، وكرداسة، والبدرشين تجمعوا صباح اليوم السبت أمام محافظة الجيزة، للمطالبة بإصلاح ماكينات الصرف الذكية الخاصة بهم.