ديالوج

شاطر: عملت إيه في ترشيحك للرئاسة
مشطور: لغاية دلوقت ماشي كويس جداً
شاطر: يعني جمعت كام توقيع
مشطور: فاضل لي 92 ألفاً و999 وأكمل ال 03 ألفاً
شاطر: معني كده أن لك قاعدة في الشارع!!
مشطور: ولا قاعدة فيثاغورث وحياتك!
شاطر: إن كان كده ماتخلي حزب من اللي ليهم كراسي في مجلس الشعب يساندك
مشطور: قالولي أعضاء الحزب أولي بالترشيح لأن أنت عارف كل حزب له مرشح واحد زي أنبوبة البوتجاز علي البطاقة
شاطر: حتي لو بعد عمر طويل قدرت تجمع التوقيعات -متأخذنيش- هتروح فين بين الفطاحل والأسماء الكبيرة مشطور: أنا عارف مقدما إني مش هاخد ولا صوت حتي صوت الحب
شاطر: نازل ليه!
مشطور: عشان لما اسقط أعارض وأقول الانتخابات حصل فيها تزوير
شاطر: الكلام ده لما يكون لك مؤيدون
مشطور: بص يامعلم.. إن شاء الله هيكون لىّ.. عارف ليه!
شاطر: ليه؟
مشطور: ماتقدرش تقول إن أنا مرشح المجلس العسكري.. ولا هتقول؟! ولا يمكن حد يتهمني بأني ليبرالي ولا ناصري ولا اشتراكي وشكلي لا هو سلفي ولا إخواني.. وماعنديش تعاملات مع أمريكا ولا اسرائيل.. يعني حليب ياقشطة
شاطر: لا.. لا استني عندك أنت فاكر إن دي ميزة!
مشطور: أمال عيب.. وبعدين اسمي توفيق يعني توافقي طبيعي «علي ابوه».. وابويا «مظهر» لأني لم أظهر بعد.. وجدي اسمه «مدني».. يعني بسم الله ماشاء الله مرشح كتالوج زي الكتاب مابيقول.
شاطر: معني كده إنك لو جمعت التوقيعات المطلوبة ودخلت الانتخابات.. ده مثلا مثلا.. هتفوز بيها!
مشطور: وباكتساح وحياة دقنك
شاطر: ياراجل قول كلام غير ده.. قدامك منصور حسن حكيم زمانه.. وصباحي اللي اتولد من بطن أمه قائد.. وأبوالفتوح اللي ربنا يفتح عليه وعلينا كمان وكمان وعمرو موسي السياسي البريو.. والبسطويسي الراجل البلسم.. وحسام خيرالله بتاع «ذهب مع الريح» «شفيق» «بونبوني» وأبوالعز اللي هينغنغنا في البط والوز
مشطور: مع احترامي لهم جميعا.. أنا خايف علي حاجة واحدة!
شاطر: بس عرفتها.. خايف تنجح وتصحي تاني تلاقي الشعب ساب البلد علي المحارة ومشي! زي «كاباكا» في مسرحية «بكالوريوس في حكم الشعوب».
مشطور: لا أنا باتكلم عن زميله منافسة!!
شاطر: اللي أعرفه إن كل المرشحين أو أغلبهم لغاية دلوقت رجالة وهي الورقة البريمو
مشطور: قصدك علي مين! بثينة كامل؟!
شاطر: قطع لسان اللي يقول عنهانص كلمة دي ست الستات..
مشطور: ياعم غلبتني قصدك علي مين!
شاطر: واحدة اسمها «مصر الجديدة»!!