دولة للإيجار مفروش بدون خلو

كنا نتهم توفيق عكاشة الإعلامى الكبير أيوه بالفم المليان كبير أوى كمان، بالجنون والعته لما قال: إن الإخوان ناويين يأجروا الهرم لقطر، وتبين أن الرجل ليس بمجنون ولا معتوه وإنما مكشوف عنه الحجاب ومعلوماته واخدها من مصدر غير مصادر وكالة هريدى نيوز، واكتشفنا أن المجنون اللى قاعد على عرش قطر بيعرض تأجير المناطق الأثريه بالفعل وأن عكاشة كان سابق زمانه ومكانه بجد يا عم عكاشة مكانك الطبيعى مش وسطينا أنت المفروض تكون فى بلاد الواق الواق.
المهم فى الموضوع ليس طرح حاكم قطر المعتوه إنما الجماعة اللى بتحكم البلد دى عملت ودن من طين وودن من طين برضوا، ولا حد طلع يكذب ولا يقدم ولا يأخر حتى الاثنين اللى معينهم مرسى لتكذيب تصريحاته اختفوا تماما وخلوا الواحد يقول: الله يرحم أيام ياسر على لما كان هو اللى بيصرح وبيكذب فى نفس الوقت يعنى باختصار كان شغال بروحين، أظن ولو أن بعض الظن إثم إن مرسى وجماعته هاينزلوا إعلان فى الأهرام الأسبوع الجاى عن تأجير الوجه البحرى مفروش والوجه القبلى إيجار جديد مع تحصيل شهرين تأمين وشهر مقدم.
مرسى وجماعته خلوا الناس فى الشارع تترحم على أيام مبارك واستحسنوا حكم الحرامى على حكم الطاغية الفاشى.