النشطاء يسخرون من هزيمة منتخب مصر أمام السنغال.. أحمد: وبيحصل مع أحسن المنتخبات ليه نتشاءم؟!.. golden: مش أحسن ما نبقى زي سوريا ولا العراق..شاكر: لو مصر ضعيفة في الرياضة دخلوها أدبي

دائمًا ما يتغلب الشعب المصري على أحزانه وإخفاقاته بالسخرية منها والضحك عليها، وذلك ما قام به النشطاء للتغلب على هزيمة منتخب مصر أمام السنغال بهدفين دون رد، حيث قام نشطاء "فيس بوك" و"تويتر" بتدشين هاشتاجين، الأول بعنوان"عودة الفراعنة"، والثاني بعنوان "مصر السنغال"، ومن خلال السخرية أكد النشطاء أن ما حدث للمنتخب المصري أفضل مما يحدث في العراق وسوريا، في حين أكد آخر أنه إذا كانت مصر ضعيفة في الرياضة، ندخلها أدبي.
أحمد فتحي: "عودة الفراعنة فعلا وهنصعد كمان بس بشرط أننا نفوز آخر ماتش على تونس في تونس بنتيجة 12-0 الموضوع سهل جدا وبيحصل مع أحسن المنتخبات ليه نتشائم".
goldenboyhassan: "عودة الفراعنة خسارة مصر من السنغال مش أحسن ما نبقى زي سوريا ولا العراق".
كارلوس: "عودة الفراعنة بس شكلهم اتقلبوا على وشهم وهما بيعودوا".
محمود يوسف:"محمد صلاح لو فاكر إنك عديت لما روحت تشيلسى تبقى عبيط إنت اتغريت ومش عاوز حتى تباصى لغيرك بلاش غرور بدل ما ترجع المقاولين تانى عودة الفراعنة".
زينب أكس ريفنسا: "عودة الفراعنة كان عندك منتخب وراح.. راح خلاص.. آه راح الحمد لله ".
توني أنتونيوس: "في يوم من الأيام من قديم الزمان كان عندنا منتخب بيتعمل له حساب من كل الأكوان اسمه مصر..مصر السنغال..عودة الفراعنة".
Egyptian_vamp: "مصر السنغال رسالة لشوقي غريب...ليه يا أخي كده حرام عليك؟ بتنزل خالد قمر كده؟".
ألوش البحيري: " يا حبايبي اعدين بتتصوروا سيلفي وضيعتوا المنتخب مصر السنغال".
محمد محمود: "مصر السنغال... يروحوا... ويوفر مصاريف اللي بتتصرف عليهم يوفروها لقناة السويس الجديدة".
كريم صلاح: "عودة الفراعنة.. مصر السنغال يعنى القيصر حسنى عبد ربه يبقى احتياطي".
أنور عبد الباسط: "مصر السنغال حسن شحاتة من غير المنتخب زى محال الصاغة من غير دهب".
عمر فايد: "مصر اتحط عليها دا بسبب غريب مختار لعيبة بقالها كتير مش بتلعب وفى الآخر يقول معلش يا رجالة مصر مش عارفة توصل للأمم الأفريقية مصر السنغال".
محمد شكر: "مصر السنغال.. إحنا شعب لينا الجنة والله".
شاكر علاء: "أنا واحشني المنتخب هوه فين.. مصر السنغال.. لو مصر ضعيفة في الرياضة دخلوها أدبى".
عمدة طويطر: "بتضحك ومصر خسرانة من السنغال ؟! مش أحسن ما نبقى زي سوريا والعراق نهاهاهاهااها مصر السنغال".
عمرو رأفت: "مصر السنغال في جميع دور العرض المصرية والأفريقية إخراج: شوقي غريب إنتاج وتوزيع: بي أن سبورت".
فؤش بياع قال: " فضلنا نقول كفاية أمم أفريقيا زهقنا منها لحد ما بقينا مش عارفين نصعد لتالت مرة..مصر السنغال".
إنجي إسماعيل: "صلاح كان ممكن يمرر الكورة لعمرو جمال ورفض وخدها لنفسه وضاع هدف لينا والمحمدى مرفعش كورة عدلة من اللى بيرفعهم في الدوري الإنجليزى! مصر السنغال".
فور مودي: " مش لو كان النور قطع كان بقى أحسن مصر السنغال.. هو ليه من يوم ما عبحليم غنى طريقك مسدود مسدود مسدود وإحنا مش فالحين فأي حاجة... حتى لما عملنا ثورتين باظو.. شعب فقر.. منتخب مصر... طير إنت ".
الريس إيهاب: " تصدقوا لمصلحتنا المنتخب يشيل كتير عشان نخلص من شوقي غريب بدري بدري مصر السنغال".