وقال الحمار

ما أنا ماشي أهُه..
لزمتها إيه اللسوعة والفرقعة وشد اللجام
ما أنا ماشي أهُه
لزمتها إيه الطرقعة.. ياشيخ حرام
وأنا لو ياصاحبي راح أنْكَسَرْ
قلب البعيد راح ينْحَسَرْ
د أنا اللي باجري علي العيال
وعليك ياشيخ
دأنا عرقي هو الْهِدْمة ليكم والطبيخ
دأنا اللي فاتح البيت ياراجل في الاصول
ما بكلفكشي غير شوية تبن بنْخَالَة
وحبة قشر فول.. وياريت بطول
أعيش كد زي العجول
انزل بقي أنا ضهري مش قادر يشيل
أصل الحمير تعبت من الشيل للحمول