ديالوج

قصور الرئاسة من الاتحادية إلي القبة، إلي قصر الطاهرة، إلي عابدين، إلي المنتزة ورأس التين، وما يستجد من قصور.. عليها أن تتأهب من الآن للحرق والطوب والبهدلة.. حتي قيل إن بعض هذه القصور خوفا من المظاهرات «عمل نفسه عشه» ومع ذلك حاول قص الاتحادية ان يتصل تليفونيا بأخيه «قصر القبة» لكي يحذره من البهدلة، ولكن الوقت كان قد فات وجري ما جري لكن المحادثة تمت متأخرة:
الاتحادية: ايه يا قبة عامل حسابك علي الطوب والمولوتوف
القبة: عملنا بوابة حديد
الاتحادية: العيال بيكسروها.. وخلي بالك من السور!
القبة: السورعندي عالي!
الاتحادية: دول قرود وممكن ينطوا السور اسألني انا!
القبة: طيب انصحني وقوللي اعمل ايه انا من كتر الخوف .. حاسس اني بقيت عشوائي زي مساكن الدويقة
الاتحادية: اجمد امال انت قديم وكان لك شنة ورنة
القبة: الناس بيحسدونا.. والقر شغال علي ودنه واننا قصور وحاجة ابهة.. بصراحة يا اتحادية يا اخويا انا لما شفت بوابتك محروقة.. وحيطانك جربانة ومولع والطوب حواليك من كل ناحية الدمعة فرت من عيني وسألت نفسي هي الناس بتعمل فينا كده ليه!
الاتحادية: عشان إحنا رمز السلطة!
القبة: ايوه.. لكن الريس بيقعد في القصر، ولما بتخلص ايامه مهما طالت بييجي غيره.. والقصر بيفضل علي حاله فين فاروق وعبدالناصر والسادات ومبارك وفين زكي جمعة؟!
الاتحادية: انت ليك نفس تهزر!
القبة: من غلبي طيب ايه رأيك انا فكرت انتحر!
الاتحادية: ياساتر يارب وتموت كافر بدون امر إزالة!
القبة: اعمل ايه بس.. تعرف دلوقت باتمني ابقي مساكن شعبية!
الاتحادية: برضه كنت هتتبهدل.. ويتخانقوا عليك.. مين يخطفك قبل غيره!
القبة: إيه رأيك نكلم الرئيس مرسي.. ونقول يستغل بيته في التجمع الخامس!
الاتحادية: اسكت ما هو بيته عامل فيها عيان وهيقع من طوله!!