مواطن يتهم سائق «أوبر» بسرقة «6000 جنيه»

نشر أحد مستخدمي موقع فيسبوك، اليوم الجمعة، يُدعى عمرو أشرف واقعة سرقة تعرض لها من سائق سيارة تتبع شركة "أوبر"، وحذر المواطنين قائلاً: "محدش يتكلم ويقول تفاصيل مهمة ليها علاقة بفلوس او عناوين وهو راكب أوبر".
وأضاف: "أول امبارح.. ركبت مع سواق أوبر من الجامعة الامريكية التجمع الخامس لشارع المشير احمد اسماعيل شيراتون، وانا راكب جاتلي مكالمة من مطعم شركتي بتشتغل معاه بيقولي انا سايبلك ٦٠٠٠ جنية في فرع المطعم اللي ف مدينة نصر ابعت المحاسب ياخدهم.. ملاني العنوان كتبته وكتبت هسأل على مين".
وتابع عمرو: "قفلت معاه كلمت محاسب الشركة وقولتله "روح مطعم كذا اللي في كذا كذا وادخل قولهم من طرف عمرو اشرف وهتاخد ٦٠٠٠ جنية وهتديهم وصل بالمبلغ"، طبعا أنا مش مدي خوانة.. سواق اوبر سمع اللي انا قولته، وصلني المكان اللي كنت رايحه واتحرك على العنوان اللي مليته للمحاسب، خلال نص ساعة كان في المطعم قالهم انه من طرفي وقالهم دا لسه مكلمكم حالا واخد الفلوس وعدها كمان وقالهم انا هطلع اجيب الوصل من العربية وسرق الفلوس ومشي".
وجاء بالأدلة التي تثبت كلامه قائلاً: "اللي اكدلي انه سواق أوبر هو اللي سرق الفلوس: كاميرا مراقبة المطعم مصوراه وهو داخل وبياخد الفلوس وبيعدها لحد ما خرج... السواق وصلني لشارع المشير والرحلة انتهت الساعة ٢ إلا عشرة، الكاميرا مطلعاه الساعة ٢ وتلت في المكان... مسافة السكة مضيعش وقت.. صورته اللي في ابليكاشن اوبر هي هي اللي في الفيديو.. محدش سمع المكالمة دي غيري انا وهو والمحاسب والمبلغ اتسرق في ظرف نص ساعة من المكالمة، والتقيلة بقى: اوبر نفسهم عارفين إنه هو اللي سرق الفلوس!".
واستطرد: "اوبر عملوا ايه اما كلمتهم؟.. بعد ما بعتلهم شكوى وبعتلهم الفيديو والصور قالولي احنا هنحاول نوصله ونتابع مع حضرتك وبس خلاص!، طلبت منهم اسم السواق بالكامل ورقم بطاقته او اي بيانات من اللي عندهم تساعدني اني اعمل محضر قالولي احنا عندنا سياسة خصوصية لبيانات السواقين ومنقدرش نديك حاجة!.. الموضوع حصل مؤخراً ولغاية دلوقتي رد أوبر هو روح اعمل محضر! طب اعمل محضر ازاي من غير بيانات... وانا استفدت منكوا ايه كدا ودوركوا ايه انا لو راكب تاكسي برضو كنت هعمل محضر!".
وكشف عن هوية السارق والسيارة قائلاً: "السواق إسمه محمد.. العربية Renault Logan.. رقمها: م ق ص257.. أنا اتسرقت واوبر شايفة ان "خصوصية" سواق حرامي اهم من سمعتها واهم من فلوس العميل".