رايحين زحل مين قال جاااااى !!

رجاء .. على السادة الركاب المسافرين على الرحلة رقم 316 والمتجهة إلى «زحل» التوجه إلى بوابة «مجلة صباح الخير»، هذا النداء هو النداء الأخير قبل الإقلاع للاحتفال بنهاية عام 2015 واستقبال العام الجديد 2016 ..
ولأن فكرى «شطح» «ونطح» وخيالى الجامح «رمح» يمكن تكون السنة دى مختلفة عن كل سنة، وهذا هو عزاؤنا الوحيد فى استقبال أى عام جديد والحقيقة أن الجرىء الفنان تامر حسنى وعدنا بأن «اللى جاى أحلى» فى أغانيه ولم أجد أى حلاوة.. غير حلاوة سبريد بالشوكولاتة هايلة مفيش بعد كده.. ولهذا كان ملاذى الأخير مع ألبوم الحزين محمد محيى واللى بعنوان «خايف من اللى جاى»، ولأننى أخشى ما أخشاه أن السنة الجديدة تعملها معانا و«تعصلج» فى النص وكأنها عربية كارو بتجر وتزق فى السنة والسنة حالفة ما تمشى غير بكوم مصايب.. لهذا قررت عدم الاحتفال برأس السنة على الأرض كما هو معتاد.. خدنا إيه من الأرض والاحتفال عليها.. مش كفاية هنندفن فيها.. وقررت بعد عرض فكرتى على رئيس التحرير ورئيسة القسم بالتحقيقات أن نقوم بعمل رحلة لكوكب «زحل» للاحتفال بالعام الجديد.. وبالمرة الشعب يغير ويجدد جو.. وإذا طلعت السنة الجديدة وحشة أهو يبقى معانا عذرنا ونقول بالفم المليان إنها حقا «سنة زحل».. يارب ما تبقى زحل.. وبعد الموافقة على فكرة الاحتفال قمنا بعمل دعوة عامة للشعب المصرى اللى يحب «يتزحل» معانا للاحتفال هناك.. وشروط الرحلة تقديم قائمة بالأشياء التى سيتم تركها على كوكب الأرض والأشخاص الذين سيتم اصطحابهم لرحلة زحل والأشياء التى لا يمكن الاستغناء عنها فى الرحلة.. وكانت السطور القادمة قوائم ركاب رحلة زحل رقم 316 التى ستقلع فى تمام الساعة 11 ليلا يوم 31 ديسمبر 2015.
• أعز صديق
الراكب الأول محمد منصور 32 سنة مدرب سباحة: أومن بالتغيير لهذا شاركت معكم للذهاب إلى زحل لنحتفل بعام جديد.. وسأقوم بأخذ صديقى المقرب «حسين» معى.. لأننا دائما نقوم بفعل كل شىء سويا.. هو أعز صديق.. وأقرب شخص على الرغم من أن لدى أخوات.. وسأقوم بأخذ البلاى ستيشن، وسأترك على الأرض خطيبتى.. لأنها غيورة وبالتأكيد ليلة رأس السنة وسفر إلى زحل هيكون هناك بنات صاروخ أرض جو.
الراكب الثانى خالد مكى 29 سنة مهندس كهرباء: فكرة الرحلة إلى زحل فكرة ممتازة.. وأنا متحمس جدا للسفر.. أنا عن نفسى هسافر مع مراتى.. وهنخلى على الأرض الموبايلات.. لأنها هى سبب بعدنا عن بعض.. بتاخد وقت كبير من حياتنا.. وسيلة بقت بتقرب البعيد عنك وبتبعد القريب منك.. وهاخد معايا فلوس كتير لأن أكيد مراتى هتحب تعمل شوبينج وتجيب هدايا تذكارية لصاحبتها.
مروة أحمد 25 سنة محاسبة الراكب الثالث قالت: أنا هسافر مع صاحبة عمرى هى صديقة المراهقة وكل حاجة نعرفها عن بعض وكل مغامراتنا قمنا بها سوا.. هاخد «أنتيمتى» سارة ونطلع على زحل.. وهسيب كل البنطلونات اللى خلتنا نسخة واحدة هرجع لأيام الخمسينيات والستينيات هاخد فساتين كتير ليا وليها ونلبس اللى نفسنا فيه هناك وأكيد مش هيكون فيه تحرش فى زحل !!
أما ملاك عبدالرحمن 23 سنة.. فقالت: هاخد معايا ماما هى كل حياتى ماليش غيرها خصوصا بعد وفاة والدى.. وهاخد معايا «لب» كتير لأنها بتحب اللب جدا وبتاكله يوميا.. وهسيب فى مصر شغلى المرهق غير المجزى ماديا أو معنويا.. فمهنة المبيعات الهاتفية مهنة منتهى الأرق .. لازم نحقق تارجت عشان ناخد فلوس.. ولازم نستحمل قلة ذوق أى عميل.
ياسمين المرغنى 36 سنة محامية: مش هاخد معايا أى حد.. وعشان الواحد يكون مرتاح لا يتاجر مع أشخاص ولا يسافر مع أشخاص.. ممكن آخد القط بتاعى «شيكو» وأسافر معاه.. وهاخد معايا.. كاميرا وكارت ميمورى سعة التخزين بتاعته عالية عشان أصور كل لحظة.. وهسيب فى مصر الموبايل عشان محدش يوصلى إذا كان فيه شبكة أساسا هناك.
• المظاهر الكذابة
محمود عبدالفتاح 38 سنة - مندوب دعائى قال: طالما إن الموضوع كله فانتازيا.. فأنا هاخد معايا الفنانة أصالة.. وتقعد تغنيلى هناك طول الوقت بحب أسمع صوتها وبنسى به العالم وبتمدنى بالطاقة.. هسيب فى مصر «الجيم» والمكملات الغذائية اللى عايشين عليها عشان نبنى أجسام تعجب فلانة وعلانة.. بمعنى تانى هسيب المظاهر الكذابة وهروح أنقى نفسى هناك.
مريم ناجى 24 سنة مترجمة: ممكن آخد معايا مجموعة أطفال أيتام أفسحهم معايا وآخد لهم ألعاب وحلويات.. وأروح مع أنقى المخلوقات أطفال ميتعدوش 5 سنوات كلهم شفافية وبراءة وفضول ألعب مع لعبهم، أضحك لضحكهم.. هسيب فى مصر الأكل الدايت كله.. عشان هخلى يوم رأس السنة اليوم المفتوح للأكل.
آلاء على 22 سنة فنون جميلة: هاخد معايا أصحابى.. والكاميرا، ولوحات ليا عشان أرسم هناك أى منظر يعجبنى.. هروح زحل وهسيب كل حاجة تزعلنى.. حتى نفسى القديمة هسيبها.. الصفات الوحشة اللى فيها هسيبها.. عشان أبدأ بداية جديدة فى رحلة مختلفة وسنة جديدة.
سارة سامر 27 سنة مبرمجة كمبيوتر: هاخد معايا العود.. ألبومات لحفلات عبدالحليم وأم كلثوم .. ومش هاخد معايا أى شخص أعرفه.. لأن فى زحل هعرف ناس جديدة ويمكن أنزل بيهم الأرض أو يأثروا عليا وأفضل فى زحل.. هسيب الميكاب كله.. عشان لما أتعرف على الناس يشوفونى على طبيعيتى اللى مش قادرة أظهر بيها على الأرض لأن ما بيعديش يوم من غير ما أعمل ميكاب.. ولو محطتش الناس بتفتكرنى تعبانة مع إنى بكون كويسة.. بس مش متعودين عليَّ كده.
عبدالله مدحت 19 سنة ثانوية عامة: هاخد معايا الكرة وهروح أدور على شباب ناشئ فى زحل وأدربهم على الكرة وأعمل أول فريق «زحلى» للكرة وأبقى حققت حلمى فى كوكب تانى غير الأرض اللى مش ممكن أحقق فيها حلمى.. وهاخد معايا صاحبى وأخويا يفتحوا مشروع بلاى ستيشن هناك.. وهسيب فى مصر اليأس والحزن، واللامبالاة وكتب الثانوية العامة.
مصطفى نوح 21 سنة: هاخد كل ذكرى بوالدتى الله يرحمها.. لبسها، سبحتها، نظارتها حتى مشطها.. هاخد معايا ابن خالى.. لأن هو سندى وضهرى وأخويا وهاخد معايا بنات خالتى عشان هيتبسطوا أوى لما أعزمهم على رحلة فى زحل ودايما متعودين نقضى ليلة رأس السنة سوا.. وهسيب على الأرض كل الناس المتلونة الموجودين فى حياتى والمضطر أعاملهم حتى لو بالنفاق.
• شوارع زحل مختلفة
ماريان عادل 30 سنة علاقات عامة: هاخد معايا عربيتى هدخلها جمرك لأن بحب السواقة.. وأكيد شوارع زحل متسفلتة ومفيش مطبات يدوية وتساعد على السواقة بانطلاق.. هاخد كمان معايا المايوه يمكن نكتشف بحر هناك.. معرفش الجو برد ولا حر هاخد معايا هدوم كتير لأن بفكر منزلش الأرض تانى.
عمرو نصر 31 سنة دكتور: هاخد معايا مراتى.. عشان تشاركنى كل لحظه مغامرة.. وكل لحظة حلوة.. لأنها اتحملت معايا كتير لحظات مرة ومن حقها تفرح.. وهاخد معايا كل الأكل اللى بنحبه وميّه عشان متتعبش ولا تتعذب هناك.. وهسيب فى مصر مشاكل الشغل وضغوط الحياة اللى دايما بتكون سبب زعل ومشاكل بينى وبين مراتى.. ولو فى إمكانية أسيب الزعل فى مصر فياريت ميسافرش معانا الحزن واليأس.•